Kasîde der-Medh-i Sultân Bâyezîd
12.10.20174
- - . / - . - . / . - - . / - . –
Kasîde der-Medh-i Sultân Bâyezîd
Gülzârı nakş idüp yine nakkâş-ı rûzgâr
Gûyâ nigâr-hâne-i gayb oldı âşikâr
Altunlu kıl kalemle muharrir gibi güneş
Gülgûnî şemsesini gülün itdi zer-figâr
3 Bir taşı la’lden biri yâkûtdan yine
Mi’mâr-ı bâğ yapdı güle goncadan hisâr
Sultân-ı gülden almağ içün cebr ile anı
Yağdurdı ana tûp u tüfeng ebr-i nev-bahâr
‘Âlem dimâğı oldı mu’attar nesîmden
Açdı çemende gonca meger nâfe-i Tatar
6 Ta’lîm-hâne oldı gülistân bu demde kim
Gül tablalardur anda gazel-hân durur hezâr
Nergis ki tutdı dâyire-i sâk-ı ‘ar’arı
Halhâl-ı zer takındı ayağına sanki yâr
San servler turuban ayağ üzre ok atar
Fınduklar oldı goncalar u tîr oldı hâr
9 Gül sohbetine da’vet ider ‘işret ehlini
El salduğı çemende budur dem-be-dem çenâr
Devlet anun bu demde ki ‘ıyş ide yâr ile
Mihnet anun ki olmaya yanında bir nigâr
Sûfî safâ-yı hâtır ise zühdden ğaraz
Su gibi eyle gûşe-i gülzârı ihtiyâr
12 Mescid kenâr-ı sebze vü tesbîh zülf-i çeng
Kandîl câm-ı bâde vü mihrâb rûy-ı yâr
Ey dil çemende gonca dehenlerle hem-dem ol
Gül mevsiminde olma sabâ gibi bî-karâr
Gül gibi kâr u bârunı câm-ı şarâba vir
Kesb-i safâ-yı bâtın idüp âbgînevâr
15 Elden koma piyâleyi nergis gibi müdâm
Cur’a-feşânlık eyle ki bezm ola lâlezâr
Bir ‘ıyş kıl ki reşk ide dâyim ana felek
Bir meclis eyle kim kala hayretde rûzgâr
Gûyâ kıyâmet oldı bahâr ile kâyinât
Hak ehli geldi cümle vücûda tutup karâr
18 A’râfı görmek ister isen bâğa gel seher
Uçmağa girmek ister isen gülsitâna var
Gül soyınup nesîme bağışladı câmesin
Muştıladı ol ki bâğa gelür diyü şehriyâr
Bülbül zebân-ı hâl ile bu hûb matla’ı
Gül meclisinde dâyim okur ider âh ü zâr
21 ‘Aks-i ruhunla çeşmüm eyâ serv-i gül-firâz
Bir gül durur ki tutdı anun çevresini hâr
Gülgûn haddine yaraşur gördi zeyn idüp
Asdı siyeh fotâsın ana zülf-i müşgbâr
Sultân-ı mülk-i derd ü belâ olmasa gönül
Sînemde tâze dâg ile olmazdı tâcdâr
24 Göz yaşı mâcerâsını ‘arz itmege sana
Yazdum kapunda surh ile bir beyt-i âbdâr
Yolunda hâk çokdan olurdum ben ey sanem
Korkum budur ki hâtıruna irişe ğubâr
Nâlemden işidüp bana zulm ü ‘itâbunı
Gözi yaşın döker sanemâ acıyup bihâr
27 Nâ-geh işide zârumı cevrüni az kıl
Ol şâh-ı berr ü bahr Süleymân-ı rûzgâr
Şeh Bâyezîd husrev-i gâzî ki tîğidür
Ye’cûc-i küfrün üzre olan sedd-i üstüvâr
Ey gülşenine şevketünün ak güli kamer
Vey bâğ-ı devletine felekler benefşezâr
30 Semt-i rızâsı ahtere olmış durur mesîr
Kutb-ı murâdını idinüpdür felek medâr
Ser-defter-i celâlet ü fihrist-i ihtişâm
Dîbâce-i sa’âdet ü târîh-i iftihâr
Sa’y-ı belîği nüsha-i takdîr-i âsümân
‘Avn-i cemîli sûret-i te’yîd-i Girdgâr
33 Hulk-ı ‘azîmi zînet-i pirâye-i kerem
Zât-ı şerîfi mâye-i ser-mâye-i vakâr
Kılmağa sengsâr ‘adûsın zamânede
Taşlarla dâmenini pür eyledi kûhsâr
Tîğıyla her yanada perâkendedür ‘adû
Seyl ile hâr u has olur elbette târmâr
36 Âb-ı sehâ-yı cûdı ile tâze her taraf
Hoş-bû nesîm-i nâfe-i hulk ile her diyâr
Benzetme atı na’lına ey dil hilâli sen
Tâ ki kimesne işide yirün kulağı var
Revnak bulursa rây-ı şerîfiyle nola çarh
K’encümden oldı içi anun cümle zer-nigâr
39 Meyl itmeseydi sana felek üzre mihr ü meh
Keff-i terâzu gibi iderlerdi sengsâr
Tîrün ki kıldı düşmenünün sînesin vatan
Hâk-i siyehde mâr durur k’eyledi karâr
‘Adlünledür umûr-ı ümem cümle muntazam
Lutfunladur esâs-ı kerem şimdi pâydâr
42 Her dürc-i dil ki olmaya medhün düriyle pür
Seng-i havâdis ile irer ana inkisâr
Miftâh-ı hâme ile ma’âni hazâ’inin
Açdum ki hâk-i pâyüne dürler idem nisâr
Sandûk-ı sîne toptolu medhün cevâhiri
‘Arz eylesem sana nola ey şâh-ı kâmkâr
45 Rengîn gazellerüm ki mey-i nâba ta’n ider
Sâğar devât u hâmem olupdur şarâbvâr
Bu bezm-i cân-fezâya gelen mest olur müdâm
Bu zîneti gören olur elbette şermsâr
Çünkim Revânî bülbülidür bâğ-ı medhünün
Gülzâr-ı dergehünde nola tuta ger karâr
48 Od urdı nazmum âteşi bâğ-ı zamâneye
Sanman çemende lâleler olmışdur âşikâr
Erbâb-ı fazl eyledi tahsîn bu nazmuma
İnsâf ehline yaraşur k’ola hak-güzâr
Tâ kim bahâr mûcib-i ‘ıyş u tarab ola
Tâ kim el üstine tutıla câm-ı hoş-güvâr
51 Gülzâr-ı devletünde açılsun gül-i murâd
Virsün ümîd ü baht u sa’âdet nihâli bâr
Ziya Avşar, REVÂNÎ DÎVÂNI, KÜLTÜR VE TURİZM BAKANLIĞI YAYIMLARI ,ISBN 978-975-17-3352-8
0
0
Yorum Yapmak için Kayıt Olun veya Giriş Yapın