Kasîde der- Medh-i Sultân Selîm
12.10.2017. / . - - . / - . -
Kasîde der- Medh-i Sultân Selîm
Çekdi seher livâ-yı zer-endûdı âfitâb
Düşdi sitâre leşkeri içine ıztırâb
Hindû-yı şeb bırakdı murassa’ kabâsını
Çün tîg-i zer-nişânı ele aldı âfitâb
3 Bu lâciverdi kal’a kapusın kılıçlayup
Yünler sokındı başına mihr-i cihân-tâb
Zerrîn kürsi kondı şehenşâh-ı Rûm içün
Kuruldı çün bu hayme-i şeş mîh u nüh tınâb
La’l ile zeyn olalı bu âhenîn kafes
Şol âbgûn sadefde görinmez dür-i hoş-âb
6 Şahbâz-ı mihri aldı ele bâzdâr-ı subh
Gördügi gibi uçdı yirinden şeb-i ğurâb
Bir bir sitâre kebkini sayd eylese ne var
Çün zeng-i zerdür ana güneş çarhdur ‘ukâb
Ağzından od saçardı seher ejdehâ-yi Rûm
Hind ehli eylese ne ‘aceb andan ictinâb
9 El-hakk harâc-ı Rûm deger zerger-i sabâh
Bu hâtem-i zebercede takduğı la’l-i nâb
Gülgûni dest-mâline bu bâğbân-ı çarh
Toldurdı ak gülleri denişürdi bî-hisâb
Altun kilindiri güneşün tâk-ı çarhdan
Düşdi döküldi bezm-i cihânda şarâb-ı nâb
12 Germ oldı câm-ı mihri ele aluban seher
Gözine geldi bu felegün bir kadeh şarâb
Meşşâtavâr âyinesine cilâ virüp
Aldı eline şâne-i zerrîn âfitâb
Bu zerreler degül görinen nev-‘arûs-ı dehr
Saçdı yüzine şîşe-i hûrşîdle key gül-âb
15 Zerrîn kutâs takdı güneş hınk-i çarha kim
Ola süvâr kadr-i şeh-i mâlikü’r-rikâb
Şâh-ı bülend-mertebe Sultân Selîm kim
Oldur sitâre-mevkib ü oldur felek-cenâb
Altun kalemle vasf-ı cemîlin yazar güneş
Oldı seher anunçün ana safha-i kitâb
18 Genc-i zamîri toptoludur gevher-i hüner
Gerdûn-ı fikretinde toğar ahter-i savâb
‘İzzet ‘aceb mi dergehüne itse ilticâ
Kapunda oldı devlete ey şâh feth-i bâb
Saff-ı ‘adûyı ta’ne-i nîzen durur bozan
İblîs leşkerin nitekim dâğıdur şihâb
21 Rây-ı cihân-güşân ile ma’mûr mülk ü dîn
Küfrün diyârı tîgün ile dâyimâ harâb
Hasmun olur ise pîl-ten ü şîr-dil dahı
Şol mâr-ı nîzen ider anı tu’me-i kilâb
Ordu-yı kadrün içre felek haymedür ana
Mücevher sütûn ü müzzehheb keştî durur tınâb
24 Hûn-ı ‘adûda gark gören na’l-i esbüni
Ebrû-yı nev-’arûs-ı zaferde sanur hıdâb
Kadr ile başı göklere irişe gün gibi
Her kim ki âsitânuna eylerse intisâb
Her demde tâze olsa nola bostân-ı feth
Âb-ı revân tîği durur başlar ki habâb
27 Kasrun yanında şekl-i felek hey’et-i zühal
San beyt-i ‘ankebûta dolaşmış durur zübâb
Devründe nâle idici yokdur meger ki ra’d
‘Ahdünde kalmadı gözi yaşlu meger sehâb
Cûdunla halka şol kadar oldı nasîb mâl
Kim her gedâ cihânda şehâ oldı zü-nisâb
30 Dâyim hayâl-i devletün eyler bu çarh-ı pîr
Merğûb olur cihânda belî ‘âlem-i şebâb
Her bir harâbeyi arasan tolu genc-i zer
Yer yok ki devletünde ana diyevüz harâb
Sâcid kapunda çarh-ı kühen baht-ı nev müdâm
Sürer yüzini Ka’be işigine şeyh ü şâb
33 Ashâb-ı fazla zât-ı şerîfün durur me’âl
Erbâb-ı dânişe işigün merci’ü me’âb
İtdi me’âni lafz-ı bedî’ünle iktirân
Kıldı me’âli câh-ı refî’ünle iktirâb
Mecmû’a-ı zamânede bu şi’ri yazmağa
Bezmünde düzdi mıstarı kânûn ile rebâb
36 Vakt oldı ‘ıyşa sun berü sâkî şarâb-ı nâb
Çengün sadâsına kulak urmış yine habâb
Hicründe mâh ile felege eylesem nazar
Başumda sanuram ki döner seng-i âsiyâb
Ol şeh-süvârın ayağın öpmege yok mecâl
Ola meger ki halka-i dîdem ana rikâb
39 Cevr ile yıkma gönlümi ey pâdişâh-ı hüsn
Begler çü kendi memleketin eylemez harâb
Kûyun içinde bana ‘ikâb itmesün rakîb
Cennetde çünki olmaz imiş kimseye ‘azâb
Şevk-i lebün durur dili küstâh eyleyen
Olur şarâb içme ile kişi bî-hicâb
42 Gûş ur Revânî bendenün ey şeh kelâmına
Kim silk-i nazma düzdi nice lü’lü-i hoş âb
Rengîn sözüme eyler isen nola i’tibâr
Şehler katında çünki bulur kadri la’l-i nâb
Bu nev-’arûs-ı nazma ne var perde olsa hat
Gâyet güzel olan urınur yüzine nikâb
45 Şehr içi Mısra döndi sözüm kandıyıla kim
Şekker-fürûş olanlara irişdi ıztırâb
Nice ki bu hisârı kılıc ile feth idüp
Kalkan ile üleşdire altunı âfitâb
Tîğ-i cihân-güşâna mutî’ ola âsümân
Gün gibi haşre dek olasın şâh-ı kâm-yâb
Ziya Avşar, REVÂNÎ DÎVÂNI, KÜLTÜR VE TURİZM BAKANLIĞI YAYIMLARI ,ISBN 978-975-17-3352-8
0
0
Yorum Yapmak için Kayıt Olun veya Giriş Yapın