Kasîde der-Sitâyiş-i Sadr-ı A'zâm ve Vekîl-i Efham Hazret-i Mustafâ

Reşîd Paşa (ve Fazzalallahu Taâlâ fî-umûrahu'l-ulyâ)

 

Mefâilün feilâtün mefâilün feilün

 

1 Girince dest-i taleb-kârına medâr-ı şuûr

Ferâgat eyledi ârâmı hâme-i pür-zûr

2 Edip daâvi-i arz-ı hüner-verîye kıyâm

Niçe dürr-i kelimât etdi zîb-i silk-i sütûr

3 Niçe dürr-i kelimât-ı güzîde kim gûyâ

Felekde her biri pertev-i mâh u kevkeb-i hûr

4 Alıp cerîde-i nazmında derc ü serd etdi

Suhanda her ne ki vardır nefâyis-i meşhûr

 19

5 Sütûn-ı seng-i belâgatle kıldı her beytin

Misâl-i kasr-ı Havernak meşîd ü ma'mûr

6 Niçe kumâş-ı hüner etdi lahzada îcâd

Ki olsa her biri şâyeste yâdgâr-ı dühûr

7 Verip libâs-ı mezâmîn-i nevle zînet-i tâm

 Arûs-ı nazmını kıldı nazîri nâ-manzûr

………

 

14 Vekîl-i şâh-ı cihân Mustafâ Reşîd Paşa

Ki oldur emr-i nizâm-ı memâlike me'mûr

15 Hıdîv-i âl-i himem ehl-i seyf ü ehl-i kalem

Muhît-i akl u hikem dâver-i reşîd-i vakûr

16 Bu bâğ-ı mülke bahâr-ı nezâreti gibi hiç

Yakında vermedi kimse tarâvet-i mevfûr

17 İlâc-ı re'y-i hekîmânesiyle def' etdi

 Ne kim mezâlime dâir alelden etdi zuhûr

18 Adem diyârına sevk etdi âb-ı tîği ile

Bu arsada ne ki bulduysa çirk-i fitne vü şûr

19 Düvelle ıkd-ı mesâfâtı eyledi te'yîd

Ne cenk kıldı ne gavgâ ne hod diğer mahzûr

20 Zihî vezîr-i Aristo-hıred ki bî-heycâ

Adû-yı dîn-i musâfâta eyledi mecbur

……..

27 Sen ol vezîr-i adâlet-semîrsin ki bütün

Zamân-ı ma'deletinde cihânıyân mesrûr

28 Nedir o mertebe hem tâli'-i müsâid kim

Sana atâ vü kerem eylemiş Hudâ-yı gayûr

29 Eğerçi cem'in irâde edersen ezdâdın

Ne mümkün olmamak emr-i muhâl iken mahşûr

30 Bu nazm-ı mülke sen oldun vesîle olmuşken

Fesâd u katle gûyâ ki güfte-i menşûr

31 Muvaffak etdi seni etdiğinçün Hazret-i Hak

Salâh-ı hâl-i berâyâya bezl-i sa'y-i vüfûr

32 Ale'l-husûs ki şâh-ı hakâyık-ı âgâhın

Hiç etmedin hudemât-ı celîlesinde kusûr

33 Senin bu devlete vâki' olan sadâkatin

 Ne mümkün eyleye vasfın bu abd-i nâ-makdûr

34 Edâ-yı sükker-i vasfında oldum acz ile lâl

Suhanda olmuş iken tûtîler gibi mağrûr

35 Nice ben olmayam ebkem muhâlif-i eyyâm

Sefîne-i dilim etdi garîk-ı bahr-ı fütûr

36 Bana bu denli maârifle ya'nî tâli' kim

Müyesser etmedi hergiz safâ-yı bâl-i huzur

………

40 Duâ-yı hayr ile eyle kasîdeni itmâm

Ki oldur âdet-i pâk-i suhan-şinâs-ı fuhûr

41 Cihânda tâ ola emr-i vekâlet mutlak

Gürûh-ı tâcvârâna göre ehemm-i umûr

42 Hemîşe eyleye zîb-i sadâret-i uzmâ

 Muvaffakiyyet ile zâtını Hudâ-yı şekûr

 

Yaşar AYDEMİR-Halil ÇELTİK, MEŞHURÎ DİVANI (Tenkitli Metin), T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3196 KÜLTÜR ESERLERİ, Ankara 2009