KASİDE
Kasîde-i Bahâriyye Der-Medh-i
İbrâhîm Paşa
müstef’ilün müstef’ilün müstef’ilün müstef’ilün
1. Evvel-bahâr irdi yine oldı cihân pür-feyz-i kâm
Mînâ-yi dil oldı mey-i şevk ile leb-ber-leb be-nâm
2. Her lâle-i yâkût-gûn olmakdadur sâgar-nümûn
Mânend-i bîd-i ser-nigûn dönsün sürâhîler müdâm
3. Güller açıldı rû-be-rû itmekde bülbüller gulû
Mestâne cûlar sû-be-sû gülşende cârî subh ü şâm
4. Sünbüllerün çözdi sabâ zülfin misâl-i dil-rübâ
Tefrîh-i cân itmez mi yâ itdükçe ta’tîr-i meşâm
5. Tutmış elinde gül ayag sahn-i çemen bezm-i ferâg
Rind olana gül-geşt-i bâg içmezse mey olsun harâm
6. Sâkî ayag al destüne ihsân-i tâm it mestüne
Bakma firâz ü pestüne toldur şarâb-i la’lfâm
7. Bu dem durur ‘işret demi gör feyz-i vakt-i hurremi
Gül üzre seyr it şeb-nemi virmekde kevserden peyâm
8. Mey didügümdür ‘aşk-i pâk peymâne kalb-i derdnâk
Sâkîsidür bî-infikâk feyz-i Hudâ-yi lâ-yenâm
9. Hum-hânesi bu nüh felek mestânesi ins ü melek
Hillinde yokdur reyb ü şek çün zemzem-i beytü'l-harâm
10. Bu bâdedür cûş eyleyen hayretle bî-hûş eyleyen
Bir katresin nûş eyleyen mest oldı tâ rûz-i kıyâm
114
11. Gamdan dili eyler halâs keyfiyyeti bî-ihtisâs
Pîrâye-i bezm-i havâs ârâyiş-i tab’-i ‘avâm
12. Sâza virür sûz-i sadâ hamr-i mecâzîye safâ
‘Uşşâka dâg-i ibtilâ ma’şûka hâl-i müşkfâm
13. ‘Aşk âteşidür muttasıl hestî-güdâz-i âb ü gil
Mişkât-i şem’-i cân ü dil andan fürûzândur tamâm
14. ‘Aşk oldı sî-murg-âşiyân zıll-i hümâ-yi lâ-mekân
Terk-i külâh-i târikân tâc-i selâtîn-i ‘izâm
15. ‘Aşk âyet-i kübrâ-yi Hak ser-nâme-zîb-i her varak
‘Akl-i küle levh-i sebak ol safha-i vahy-irtisâm
16. Ol nüshadan tesvîd ider levh-i hayâle dil meger
İlhâm-i Hakkı ser-te-ser bî-hâme vü harf ü kelâm
17. Sonra olup dilden ‘ıyân sad-ma’nî-i râz-i nihân
Hâmem ider ratbü'l-lisân evsâf-i sadr-i nîk-nâm
18. Sadr-i sudûr-i bî-bedel gayret-keş-i dîn ü düvel
Nazm-âver-i mülk ü milel düstûr-i sâhib-ihtişâm
19. Ol sadr-i memdûhü's-siyer ol dâver-i rûşen-güher
Ol müsteşâr-i pür-hüner ol âsaf-i ‘âlî-makâm
20. Lutf-i Hudâdur ‘âleme in’âmı gâlib Hâteme
Vâcib durur her âdeme itmek senâsın iltizâm
21. Seyr it kef-i ihsânını dehrün düketdi kânını
Kemter-dür-i galtânını neşr idemez bahr ü gamâm
22. Sultân-i dehrün mahremi dâmâd ü sadr-i a’zamı
Düstûr-i sâhib-hâtemi engüşt-nümâ-yi hâs ü ‘âm
115
23. Ser-cûş-i ‘ummân-i kerem dergâhıdur kân-i kerem
Yagmâ-kun-i hân-i kerem paşa-yi İbrâhîm-nâm
24. Mülk-i cihâna gelmedi mânend-i zât-i evhadi
Dünyâyı memnûn eyledi ol server-i ferhunde-nâm
25. Cûd ü sahâda bî-riyâ şibh ü nazîr olmaz ana
Ca’fer rikâbında sezâ olursa bir kemter gulâm
26. Tevfîk-i Hakdur yâveri def’ eyledi şûr ü şeri
Ma’mûr idüp her kişveri ‘asrında râhatda enâm
27. Fermân-beri tîg ü kalem mahkûmı esnâf-i ümem
Tedbîri dehre dem-be-dem pîrâye-bahş-i intizâm
28. Lutfı ki ‘adl ü dâd ider âfâkı yek-ser şâd ider
Bülbül fakat feryâd ider ol dahı pür-şevk ü garâm
29. Bir ferdi çerh-i fitne-kâr itmez dem-i ‘adlinde zâr
Murg-i dile gîsû-yi yâr ola meger kim tavk-i dâm
30. Ref’ itdi ‘adli bî-sitem beynûnet-i ezdâdı hem
Ünsiyyet-i gurg ü ganem eyler hezârân igtinâm
31. ‘Ahdinde âşûb ü mihen güm-geştedür âfâkdan
‘Adliyle nîrân-i fiten efsürde-i Âö Ë œd
32. Dünyâya feyz-i şâmili râhat-resândur hâsılı
İnsâf-i tab’-i kâmili müşkil-güşâ-yi her merâm
33. ‘Itr-i senâsın nâ-gehân yâd itse olur bî-gümân
Müjgân-i çeşm-i hastegân şâne-zen-i zülf-i meşâm
34. Ey zîver-i sadr-i güzîn ey dâver-i mesned-nişîn
Ey saf-der-i nusret-karîn ey zât-i bircîs-ihtirâm
116
35. Sensin melâz-i bî-kesân kehfü'l-amân ârâm-i cân
Hâtır-nevâz-i bendegân iksîr-i a’zam-bahş-i kâm
36. Dergâhunı ehl-i hüner idüp melâz ü müstakar
İkbâl-i tâli’le ider gerdûndan ahz-i intikâm
37. Bu ‘abd-i hâsun siyyemâ dergâhun idüp mültecâ
Oldı be-vefk-i müdde’â lutfunla makziyyü'l-merâm
38. Mazhar olup eltâfuna ihsân-i tab’-i sâfuna
Şâyestedür evsâfuna incü gibi virse nizâm
39. Tab’umla itdüm ba’d ez-în bu vech ile ‘ahd-i metîn
Kim hâme-i feyz-âferîn idüp senânı iltizâm
40. İtdükçe feyz-i Hak zuhûr oldukça tab’um gark-i nûr
Hîç itmeye andan sudûr evsâfunun gayrı kelâm
41. Sâmî bu niyyet üzre gel izhâr idüp hüsn-i ‘amel
Vir nazm-i pâke mâ-hasal da’vât-i hayr ile hitâm
42. Fasl-i bahâr ile cihân tâ kim ola reşk-i cinân
İkbâlün ola bî-hazân çün ravza-i dârü's-selâm
43. İkbâl ü ‘ömrün dâ’imâ efzûn idüp Bârî-Hudâ
Hussâdun ola mübtelâ derd ü gama bî-infisâm
(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0