kasîde-i belîga fî-medhi’n-nebî (s.a.v)
I
1. Dil derdine devâdur hakkâ du’â-yı Ahmed
Cân bezmine senâdur medh ü senâ-yı Ahmed
2. Geçdi iki cihânı üns oldı âşiyânı
Ol ‘âşıkun ki cânı oldı fidâ-yı Ahmed
3. Kesr oldı haclet ile a’lâmı her emîrün
Nasb oldı nusret ile çün kim livâ-yı Ahmed
4. Mi’râc-ı enbiyâdur bir pâye ‘izzetinden
Ser-tâc-ı evliyâdur na’leyn-i pây-ı Ahmed
5. Ednâ habâbe iken deryâ-yı hikmet oldı
Ol ‘ârifün ki gönli toldı hevâ-yı Ahmed
6. Yâ zümrete’l-usâtun hayyû ale’s-salâtin
Sallû ile’l-memâtin hayyû âle’n-necâtin
II
1. Ay ile gün felekde ‘aks-i rikâb-ı Ahmed
Bunca şeref melekde ihsân-ı bâb-ı Ahmed
2. Kâl ile cümle kalbi pâk itdi kâli anun
Feth itdi bâb-ı fazlı fasl-ı hitâb-ı Ahmed
3. Nûr-ı hidâyetiyle ‘âlem münevver oldı
Ferr ile tâli’ oldı çün âfitâb-ı Ahmed
4. Bir pertevinde hüsni kevneyni nûr iderdi
Ger olmasa arada ha’il nikâb-ı Ahmed
5. Çün menba’-ı şekerdür anun mübârek agzı
Ashâba şerbet olsa tan mı lu’âb-ı Ahmed
6. Yâ zümrete’l-usâtun hayyû ale’s-salâtin
Sallû ile’l-memâtin hayyû âle’n-necâtin
III
1. Cûyende-i delîle besdür sirâc-ı Ahmed
Şâfî yiter ‘alîle hakkâ ‘ilâc-ı Ahmed
2. Hikmet budur ki taht-ı ‘arşa şehenşeh iken
Fakr u ‘anâ ‘abâ vü terk oldı tâc-ı Ahmed
3. İns ü firişte anun kadrine nice irsün
Üns iledür sirişte çün kim mizâc-ı Ahmed
4. Yandı hased odına pervâne gibi düşmen
Gün gibi rûşen oldı tâ kim sirâc-ı Ahmed
5. Kan olsun içer ise câm-ı Cemün şarâbın
Ol câna kim olupdur mest-i zücâc-ı Ahmed
6. Yâ zümrete’l-usâtun hayyû ale’s-salâtin
Sallû ile’l-memâtin hayyû âle’n-necâtin
IV
1. Âyîne-i Hudâdur vech-i melîh-i Ahmed
Nukl-i mey-i safâdur nakl-i sahîh-i Ahmed
2. Cümle fasîhe virdi bir noktası fazîhat
Pür-nüktedür hakîkat kavl-i fasîh-i Ahmed
3. Sultân-ı tâc-ı devlet hakan-ı taht-ı ‘izzet
Tâbân-ı sûbh-ı rahmet vech-i sabîh-i Ahmed
4. Yâ Rab ne resme sıgsun bir kaç buhûr-ı nazma
Deryâ-yı bî-kerândur çün kim medîh-i Ahmed
5. Yâ zümrete’l-usâtun hayyû ale’s-salâtin
Sallû ile’l-memâtin hayyû âle’n-necâtin
V
1. Hırz-ı emân enâma iz’ân-ı nâm-ı Ahmed
Ümmîd-i hâs u ‘âma in’âm-ı ‘âm-ı Ahmed
2. Ehl-i risâlet içre çün bunda Mustafâdur
Mahmûd olursa tan mı anda makâm-ı Ahmed
3. Efrâsyâb-demdür kemter gulâmı anun
Cân milketinde Cemdür ser-mest-i câm-ı Ahmed
4. Sîmurg-ı devlet eyler ‘âlemde himmetiyle
Ol cân kuşın ki nâ-geh sayd itdi dâm-ı Ahmed
5. ‘Âkildür ol kişi kim vird idinür dürûdın
Dârü`s-selâma iltür çün kim selâm-ı Ahmed
6. Yâ zümrete’l-usâtun hayyû ale’s-salâtin
Sallû ile’l-memâtin hayyû âle’n-necâtin
VI
1. Kevn ü mekâna sıgmaz çün taht-gâh-ı Ahmed
Nice beyâna sıgsun evsâf-ı câh-ı Ahmed
2. Ruh döndürüp cedelden mât ola nice şehler
Çün süre devlet atın hayl ü sipâh-ı Ahmed
3. Da’vî deminde bedri şakk itdügi budur kim
Kadr-i tamâma ire tâ kim güvâh-ı Ahmed
4. Şer’i tarîkatinde sâbit-kadem ol ey dil
Bezm-i necâta iltür çün ‘azm-i râh-ı Ahmed
5. Rûz-ı cezâda Hamdî ümmîdümüz budur kim
Mahv ide bin günâhı bir dem nigâh-ı Ahmed
6. Yâ zümrete’l-usâtun hayyû ale’s-salâtin
Sallû ile’l-memâtin hayyû âle’n-necâtin
Ali Emre Özyıldırım, Hamdullah Hamdi Divanı, https://ekitap.kulturturizm.gov.tr/dosya/1-213627/h/giris.pdf