KASÎDE-İ RAHMÎ Lİ-MEDHİ SULTÂN SELÎM HÂN
10.07.2016KASÎDE-İ RAHMÎ Lİ-MEDHİ SULTÂN SELÎM HÂN
[mefâ’ilün fe’ilâtün mefâ’ilün fe’ilün]
1 Sepîde-dem yine ibdâ’-ı ‘âlem-i imkân
Vücûd hil’atını itdi nâmeye ihsân
2 Sahîfe-i çemene yazdı hâme-i kudret
Hudûs-ı dehre delîl olmaga niçe bürhân
3 Görindi ebr-i bahârî içinde kulle-i kûh
Siyâh şâlla deyr içre nitekim ruhbân
4 İletdi gûy-ı şitâyı bu ‘arsadan taşra
Eline kavs-i kuzahdan felek alup çevgân
5 Sadâ-yı ra’dla kûh üzre sanki ebr-i teng
Şu tıfldur ki ide dûş-ı mâderinde figân
6 Şükûfe penbe-i gaflet durur ki gûşından
Çıkardı şâhuŋ anı dest-i kudret-i Yezdân
7 Şu tıfl-ı nevrese beŋzer ki ola çûba süvâr
Şükûfe şâh-ı tekâverde kim ola pûyân
8 Hevâ-yı mihrle germ oldı bezm-i gülşende
Diline şevk ile dâg urdı la’le-i nu’mân
9 Libâs-ı al ile gül hâr u haslara mahrem
‘Aceb mi bülbül-i zâr olsa hecr ile nâlân
10 Firengî şabka geyer lâle dil-ber-i tersâ
Sanemler ile müzeyyen olup bu deyr-i cihân
11 Mu’allim oldı sabâ mekteb-i gülistânda
Okıtdı goncanuŋ etfâline Bahâristân
12 Nihâl-i serv çemende bu matla’uŋ makarı
Rumûzın eyledi ezhâr-ı bâg [u] râga beyân
13 Gül itdi hançer-i hâr ile bülbüli kurbân
Cebîni üzre kodı tıfl-ı gonca katre-i kân
14 Bahâr-ı nev irişüp zeyn olundı meh-rûlar
Niteki ravza-i ‘ulyâda hûrla gılmân
15 Şu resme buldı perîlerle her çemen sûret
Niteki bütler ile zeyn ola nigâristân
16 Bahâr-ı tâze virüpdür cihâna revnak-ı tâm
Meger ki seyre çıkar ol şeh-i ‘azîmü’ş-şân
17 Hidîv-i kişver-i ‘izzet nizâm-ı devlet ü dîn
Çerâg-ı tûde-i şâhân-ı neyyire-i ‘Osmân
18 Ki ya’ni Hazret-i Sultân Selîm ol hânuŋ
Kemîne bendesi Fagfûr [u] Hüsrev ü Hâkân
19 Nişân-ı na’li semendidür efser-i ikbâl
Gubâr-ı dergehidür kühl-ı dîde-i a’yân
20 Sarîr-i hâmesi hallâl-i müşkilât-ı umûr
Zamîr-i rûşenidür kâşif-i rumûz-ı cihân
21 Sa’âdet ile vücûd-ı şerîfi olmışdur
Makarr-ı gevher-i cûd u hazîne-i ‘irfân
22 Vücûduŋ ile cihân mülkine hayât irdi
Niteki cevher-i cisme irince neş’e-i kân
23 Çerâg-ı ‘ömri söyindürmez idi bâd-ı fenâ
Eger ki hıfzuŋ eli tutsa üstine dâmân
24 Nesîm-i terbiyetüŋ lutfla güzer kılsa
Biterdi sahre-i sammâda sünbül ü reyhân
25 Hezâr şem’-i münevver uyardı cûduŋ eli
Cihânda mâh gibi haşre dek olur tâbân
26 Bülend-himmetüŋ ol bâzdur hümâ-pervâz
Firâz-ı küngüre-i ‘arşa gâh ider tayerân
27 İşâretüŋe müfevvez tekallübât-ı umûr
‘İnâyetüŋe menût intizâm-ı kâr-ı cihân
28 Sen ol emîr-i ekâlîm-i evc-i ‘izzetsin
Sarây-ı kadrüŋ içinde felek tokuz eyvân
29 Du’â-yı devletüŋi ben nice idem tahrîr
Devât beste-dehân u kalem şikeste-zebân
30 Elüm nice ire takrîz-i vasf-ı zâtuŋa kim
O mülki peyk-i hayâl itmedi dahi seyrân
31 Hayâl güllerini dirdi bâg-ı medhüŋde
Bu bâgbân-ı tefekkür girüp bu bâga revân
32 Zamânede yine bir nahl bagladum tâze
Kad-i nigâr misâli gören olur hayrân
33 Ne bâgdur bu ki hergiz aŋa hazân irmez
Ne nahldür bu ki her demde gülleri şâdân
34 Figân iderse nola Rahmî ‘andelîb-âsâ
Zamâne gonca-i maksûdın itmedi handân
35 Bu enbuhî kafes içinde bülbül-i zârem
Şikeste-bâl idüpdür havâdis-i devrân
36 Ne rûzgâr müsâ’id ne baht-ı devlet yâr
‘Aceb mi ra’d gibi dâyim eylesem efgân
37 Felek sitîzesi bir yaŋa ta’ne-i a’dâ
Diyâr-ı gurbet-i kürbetle gayret-i akrân
38 Zamâneden nice şekvâ idersin ey dil-i zâr
Du’â-yı devletin eyle hemîşe vird-i zebân
39 Niteki şâhid-i gül karşusında gülşende
Figân u nâle ide ‘andelîb-i pür-efgân
40 Serîr-i evc-i selâmetde ber-karâr olasın
Sa’âdet-i ebedî ile hoş geçür devrân
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
0
0
Yorum Yapmak için Kayıt Olun veya Giriş Yapın