KASÎDE-İ RAHMÎ Lİ-MEDHİ SULTÂN SÜLEYMÂN HÂN

[mefâ’îlün mefâ’îlün mefâ’îlün mefâ’îlün]

 

1 Şeh-i gabrâ sipihr üzre nitekim Rûm sultânı

Kevâkib ‘askeriyle menzil itdi hâveristânı

2 Ele âyîne-i gîtî-nümâ alup seher eflâk

Sikender-vâr tâ andan temâşâ ide devrânı

3 Kırân itdi sitâre ‘askeriyle burc-ı çarh üzre

Çeküp sâhib-kırân gibi güneş bir tîg-i bürrânı

4 Neberd içün seher cünd-i Habeşle pehlevân-ı subh

Sokundı nice zerrîn per yanında çarhî kalkânı

5 Şafak sanmaŋ ki gâr-ı çarh içinde Rüstem-i hurşîd

Döküp zengî-i Şâmuŋ kanını al oldı dâmânı

6 Zümürrüd kubbenüŋ zerrîn külâhı mihr-i ‘âlem-tâb

Kılâ’-ı zeng-bârı subh-dem feth eyledi anı

7 Bürûc-ı çarh ser-tâ-ser tonandı tâb-ı mihr ile

Nitekim müjde-i feth ile yir yir şehr dükkânı

8 Gelüp peyk-i beşâret mürde diller tâze cân buldı

Nitekim cism-i nâmîye iricek rûh-ı hayvânî

9 Hevâya atdı tâcın bu haberden hüsrev-i hâver

Felekde çarh urup kerrûbiyân-ı mülk-i rûhânî

10 Revâdur bu gazâyiçün kılâ’-ı tâk-ı gerdûndan

Çalınsa kûs-ı sultânî urılsa tabl-ı hâkânî

11 Ki ya’ni şâh-ı bahr u ber Sikender-der Ferîdûn-fer

Şeh-i kişver-güşâ bebr-i vegâ vü zıll-i Yezdânî

12 Şehenşâh-ı yegâne Hazret-i Sultân Süleymân Hân

Çerâg-ı tûde-i hâkân hidîv-i Âl-i ‘Osmânî

13 Neyistân oldı yir yir nîze deşt-i rezm-gâh içre

Dilâverler olupdur ol mekânuŋ bebr ü şîrânı

14 Şu şeyh-i müttehîdür tekke-i heycâda tîgüŋ kim

‘Adû-yı nâ-tüvân kurbân getürmişdür aŋa cânı

15 Dıraht-ı bâg-ı nusret oldı tûguŋ perçemi üzre

Hümâ-yı himmetüŋ şâhâ idinmiş âşiyân anı

16 Başına tâcın oldurduŋ şehâ gördük kızılbaşuŋ

Nola rûbâha saymazsaŋ sezâdur şâh-ı Şîrânı

17 Şu resme lâle-veş tîgüŋ yire dökdi ‘adû kanın

Anı pâk itmeye olsa hezârân Nûh Tûfânı

18 Senüŋ ey şâh-ı şîr-efgen olupdur devr-i ‘adlüŋde

Hezârân kellesi gürgüŋ bugün bürîde çevgânî

19 Güneş bir altun üsküflü kuluŋdur âsitânuŋda

Gulâm-ı zer-külâhuŋ bende itdi mâh-ı tâbânı

20 Kuşatduŋ zer kemer zeyn eyledüŋ altun beŋeklerle

Yanuŋda pâdişâhum tîg gibi niçe ‘üryânı

21 Vücûdı safhasına yazdı a’dânuŋ ney-i tîrüŋ

Midâd-ı sürh ile feth âyetini hatt-ı ‘İmrânî

22 Şerî’at genc-i mahfîdür anı hıfz içün a’dâya

Kılıcuŋ heft-ser ejderdür olmışdur nigehbânı

23 Ne şâhid-bâz olupdur perr-i nusret rûz-ı heycâda

Kenâr itdi livâ-yı şeh gibi serv-i hırâmânı

24 ‘Adûnuŋ hâne-i kalbi niçün târîk olur şâhâ

Okuŋ bir şem’dür anuŋ ucında şu’le peykânı

25 Kazâ bir câme-bahş şâhid-i kadrüŋ kaddine râst

Gümüşden tügmesi encüm hilâl altun girîbânı

26 Meger bir Sâmirî mahbûb olupdur tîg-i hun-rîzüŋ

Görürse cân virür aŋa ‘adû yalmanı yalmanı

27 Sa’âdetle sirişt olmış ezelden tînet-i pâküŋ(?)

Dahi sûretle terkîb olmadan cism-i heyûlânı

28 Felekde ‘adlüŋ olmasa eger mazlûmuŋ âhından

Tutardı mihr ü meh âyînesini jeng-i zulmânî

29 Medâr-ı devletüŋ merkezlerine irmeye pergâr

Tolansa âhenîn pây ile ger gerdûn-ı gerdânı

30 Şehâ rây-ı cihân-ârâya ‘arz-ı hâl ider Rahmî

Diler keşf eyleye dilde olan her râz-ı pinhânı

31 Hakîkatle baŋa ma’lûm olur mâhiyyet-i eşyâ

Hudûs ile kıdemden bahs idüp bildüm çü imkânı

32 Bahâristân-ı nazma şöyle virdüm zîb ü zînet kim

Ola bir bülbüli seyr itse Sa’dî bu gülistânı

33 Hevâ-yı sît-ı nazmum şöyle pür itmişdür âfâkı

Çalınmaz oldı tabl-ı nazm-ı Hüsrev kûs-ı Hâkânî

34 Ma’ânî güllerinden bagladum bir nahl-i ra’nâyı

Hazân irmez bahârına nitekim cennet-i sânî

35 Belâgat gülsitânından kopardum bir gül-i ra’nâ

Fakîrâne tekellüf eyler isem şâha erzânî

36 Ne sîm ü zerle şâdânem ne bir mansıbla handânem

Berîyüz cümle hazlardan ne cismânî ne rûhânî

 

Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,