Kasîde-i Sultân Murâd Hân
Fâ`ilâtün fâ`ilâtün fâ`ilâtün fâ`ilün
1 Sâgar-ı zerrîn-i mihri çarh gerdân eyledi
Bülbül oldı mest-i gül çâk-ı girîbân eyledî
2 Gülşeni devr itdi bâd evrâk-ı gülle subh-dem
Şevke geldi sanki bir tâvûs cevlân eyledi
3 Gonce tıflın şöyle itdi terbiyet ebr-i bahâr
Gül gibi bir nâzenîn-i pâk-dâmân eyledi
4 Gül şikâf-ı gonceden itdi nihânî bir nigâh
Şevket ü câhın görüp kendin nümâyân eyledi
5 Himmet-i vâlâ vü baht-ı ercümendi seyr idün
Bîd-i müşgi mülket-i gülzârda bân eyledi
6 Yaydı bûy-ı sünbüli gülzâra bâd-ı nev-bahâr
Nev-arûs-ı vakt zülfün anber-efşân eyledi
7 Şöyle gevher-pâş oldı bâga sultân-ı bahâr
Lâle câm-ı işretin la`l-i Bedahşân eyledi
22
8 Lâle vü gül takınur oldı güzeller şimdi hep
La`l ü gevher kıymetin ezhâr erzân eyledi
9 Her biri itmekdedür şevk ü safâ mürgin şikâr
Bülbülân-ı bâg kâr-ı şâh-bâzân eyledi
10 Aşiyânını debistân itdi bülbül bâgda
Beççeler etfâlına ta`lîm-i elhân eyledi
11 Bir zamân ile söyündürmişdi yine rûzgâr
Nergisün zerrîn çerâgını fürûzân eyledi
12 Lâle şem`in vaktidür yaksa benefşe kaplayup
Gülşenün etrâf u eknâfın şebistân eyledi
13 Yakdılar meş`allerin nergislerün gülzârda
Var ise şâh-ı cihân meyl-i çerâgân eyledi
14 Hazret-i Sultân-ı Gâzî Hân Murâd ol şâh kim
Nev-bahâr-ı adli dünyâyı gülistân eyledi
15 Halk-ı `âlem sâye-i `adlinde hep âsûde-hâl
Ebr-i Nîsânî gibi ihsânı yek-sân eyledi
16 Yer yüzinde zulmet-i zulmi izâle itmege
Hak te`âlâ tîgini hurşîd-i rahşân eyledi
17 Hazret-i Hak şöyle virdi havl ü kuvvet ana kim
Oldı nâfiz her ne kim emr itdi fermân eyledi
18 Rûbeh-i pür hîleveş kaçdı mukâbil olmadan
Hasm-ı dûna çün hücûm-ı şîr-i garrân eyledi
19 Karşuya bir kerre turmadı mukâbil olmadı
Heybet-i şemşîr-i kahrından hirâsân eyledi
23
20 Tîg-i kahrından hirâsân oldı baş göstermedi
Didiler havfından âheng-i Horâsân eyledi
21 Pâdişâhâ hazretün memdûh-ı `âlem eyleyen
Ben kulun sana du`â-gûy-ı senâ-hân eyledi
22 Cân u dilden eyler elbette du`â-yı devletün
Kadrüni Yahyâ gibi her kim ki iz`ân eyledi
23 Devletün dâ'im idüp ömrün firâvân eylesün
Ol Hudâ kim âleme lutfın firâvân eyledi
Hasan KAVRUK, ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞIhttps://ekitap.kulturturizm.gov.tr/Eklenti/