Kerem Redifli Kasidesi II Ahmet Paşa
06.04.2016
Kaside II
( Şeyhi'nin "Kerem " Redifli Kasidesine Nazire )
Yine ıyd oldu bu gün erdi çü devrân-ı kerem
Zevk u ayş it yine hurrem olup iy kân-ı kerem
Dest-i cûdunla senün âm olalı ihsânun
Kapuna geldi umarâb-ı sehâ nân-ı kerem
3. Cûdunun katresidür kulzüm-i zehhâr-ı necât
Lûtfunun zerresidür ebr-i dür-efşân-ı kerem
Nazar-ı merhametün cevher-i iksîr-i hayât
Âsitânun tozıdur mihr-i dırahşân-ı kerem
Yine cûdunla biter verd-i gülistân-ı atâ
Yine sözünle olur meyve-i bostân-ı kerem
6. Açılur hulkun ile bu gül-i gülzâr-ı kemâl
Salınur lütfun ile yine bu atşân-ı kerem
Tûtî-i nutkuna lâyık şekeristân-ı makâl
Bülbüli tab‘una lâyık bu gülistân-ı kerem
İlmün ile okınur nüsha-i devrân-ı ulûm
Adlün ile yazılur defter ü dîvân-ı kerem
9. Olmaya zât-ı şerîfün gibi bir cism-i latîf
Gelmeye rûh-ı azîzün gibi bir kân-ı kerem
Ya’ni kim Âsaf-ı devrân mu’in-i fuzalâ
K’ayağı toprağıdur sürme-i a’yân-ı kerem
Matla’-ı şems-i hayâ mecmâ-ı envâr-ı atâ
Menba‘-ı cûd u sehâ mâye-i ummân-ı kerem
12. Merkez-i sıdk u safâ dâ’ire-i nokta-i cûd
Kâtı‘-i hıdk u hased hüccet-i burhân-ı kerem
Zulmet-i fakrun içinde kalana göstere yol
Matla’ından doğıcak bu meh-i tâbân-ı kerem
Ne Mesihâ-dem olursın ki dem-i lûtfun ile
Kevser-i cân akıdur ravza-i Rıdvân-ı kerem
15. Yâ dehânunda senünçün ne kerâmet kodı Hak
Teşne-i cûda olur Çeşme-i Hayvân-ı kerem
Acebâ zât-ı kerîmün ne kerâmet kodı kim
Basduğun yirler olur uçdan uca kân-ı kerem
Bu felek yazmasa nüshandan eger nâmesini
Yanlış olaydı kamu defter ü dîvân-ı kerem
18. Sana biçdi yine bir hil ‘ati hayyât-ı cihân
Kim anun dâmeni cûd oldı girîbân-ı kerem
Bahr-i cûdunda atâ zevrakına yelken urup
Bâd-ı lutfunla bugün gezdürür uş anı kerem
N’ola gülzâr ola tab’um bite mehdin güli kim ?
Ebr-i cûdunla yağar çün bana nisân-ı kerem
21. Şem-veş bezm-i kemâlünde yanar rişte-i dil
N’ola rûşen dir isem medhüni sultân-ı kerem
Kullaruz hâlümüz anlatmaya geldük kapuya
İntizâruz ki icâzet vire sultân-ı kerem
Husrevâ pâdişehâ cûdunı dil şerh idemez
Gerçi medhünle dolar defter ü dîvân-ı kerem
24. Âstîn-i keremünden pür olur dâmen-i çarh
Âsitânında açıldukça girîbân-ı kerem
Dürr ü gevher saçılur katre-i bârân yirine
Çünkü cûdun buludından yağa nisân-ı kerem
Kimyâ oldı kamu ehl-i sehânın nazarı
Olalı hâk-i derün sürme-i a’yân-ı kerem
27. Himmetün haylı sehâ mülküne kıldıkça nüzûl
Çünkü her gûşe-i haymen ola meydân-ı kerem
Niçün iflâsum ola mûcib-i taklîl-i atâ
Niçin ihlâsum ola bâ’is-i hirmân-ı kerem
Ne revâdır ki cihân lutfuna gark olmış iken
Kapu kapu dolanam bulamayam nân-ı kerem
30. Nice bir gülmeye bu gonca-i gülzâr-i ümîd
Bezenürken dem-i lûtfunla gülistân-ı kerem
Su batırmaz utanur kendü mürebbâlarını
Beni niçün batıra gussaya ummân-ı kerem
Beni hâr eyleme çün izzeti sen vermiş idin
Lûtfuna olma perîşân ki budur şân-ı kerem
33. Hâric-i merkez ü hadd oldu çü üftâdeliğüm
Demidür merhamet it var ise imkân-ı kerem
Ne kerem ola ki mağlûb edine anı günâh
Ne güneh var ki zebûn eylemez anı kerem
Tutmışuz çünkü hacâlet yüzine özr eteğin
Ayb-pûş olsa ba’îd olmaya dâmân-ı kerem
36. Âmdır lûtfun eger bizde liyâkat yok ise
Layık it lûtfun ile lûtfuna iy kân-ı kerem
Nola ger yâd edesin Ahmed’i bir lutfun ile
Gerçi lâyık değülim sana budur şân-ı kerem
Ehl-i fazlun bilinür kadri senün kapunda
Hazretün alsa eline yine mîzân-ı kerem
39. Şeker-i midhatunun tûtîsi çok gerçi şehâ
Görme her tûtîyi bir iy şekeristân-ı kerem
Şeref adunla bula nâme-i ikbâl ü atâ
Cûdun ile yazıla defter ü dîvân-ı kerem
Yir ü gök medhün okısun sen otur devlet ile
Âsumân tahtun ola menzilün eyvân-ı kerem
0
0
Yorum Yapmak için Kayıt Olun veya Giriş Yapın