KASİDE Kim benüm vaz‘um görüp dirse sefâhat üzredür

KASİDE

 

Fâ‘ilâtün/ Fâ‘ilâtün/ Fâ‘ilâtün/ Fâ‘ilün

 

Kim benüm vaz‘um görüp dirse sefâhat üzredür

Hak budur tab‘ı anuñ hayli hamâkat üzredür

Vaz‘ u endâm u kıyâfet bende olmışdur tamâm

Yürüsem heybetle reftârum şecâ‘at üzredür

Çehre hûb u lihye mevzûn çeşm ü ebrû bî-bedel

Bendeki şekl ü şemâ’il hep vecâhet üzredür

Asluma kılsañ nazar begdür sipâhîdür kamu

Fer‘umı görmez misin niçe melâhat üzredür

5 Kimse yokdur ehl-i ‘irfân içre akrânum benüm

Baña nisbet gayrılar zîrâ denâ‘at üzredür

Zâhirümden hısset añlarmış benüm her bî-mezâk

Tâ ezelden tab‘-ı pür-şevkum sehâvet üzredür

Ben Süleymân-ı zamânem Yûsuf’ı cânum sever

Mısr-ı ‘ışk içre benüm hâlüm ticâret üzredür

Vâkıf olmasa ‘aceb mi kimseler esrâruma

Cür‘adân-ı dilde her işüm zarâfet üzredür

Gördügince niçe gamgîn olmasun a‘dâ beni

Ben refâhiyyetdeyin anlar felâket üzredür

10 Kanda gitsem birbirine gösterür barmag ile

Halk-ı ‘âlem ser-be-ser şimdi delâlet üzredür

Ba‘zı müfsidler baña deyyûs-ı mahfî dir imiş

Zâhirâ kim dir ki ahvâlüm riyâset üzredür

Kandagı dânâ okurlarmış benüm târîhümi

Bu makûle sözlerüñ ehli kabâhat üzredür

43

Nazm-ı gevher-bârumuñ kadrin ne bilsün her denî

Sözümi şol kimse añlar kim kiyâset üzredür

Mâh-rûlar pâyine yüz sürmek el virse ne tañ

Kevkeb-i baht-ı şeref-bahşum sa‘âdet üzredür

15 Her kaçan kim kûy-ı cânândan yaña ‘azm eylesem

Seyrüm ol Firdevs bâgında nezâket üzredür

Kimseye hergiz zarar kasditmezin ‘âlemde ben

Her mazarratdan dil ü cânum ferâgat üzredür

Baña Yûnuszâde dirler Ravziyâ bilmez misin

Her kelâm-ı hûb u mevzûnum belâgat üzredür

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009