mefâ’îlün mefâ’îlün mefâ’îlün mefâ’îlün

 1. Dil oldı güm-sürâg-i deştgâh-i ‘aşk ü hayrânî

 Ki gerd-i hâtır-i ‘uşşâkdur rîg-i beyâbânî

 2. Gönül bâr-efgen-i gafletdür ol vâdîde kim anda

İder bîdâr savt-i pây-i mûrân çeşm-i düzdânı

 

 3. Derâ-yi kârvânı savt-i Mansûr-i ene’l-Hak-gû

 Metâ’-i nâ-revâcı küfr-i mahmil-zîb-i San’ânî

 4. İder her zahm-i pâyı âteşîn-gird-âb-i bahr-i ‘aşk

 O tîh-i bî-kerânun rîze-seng-i şu’le-efşânı

 5. Hızır pergârveş ser-geşte-gerd-i sath-i pehnâsı

 Felek çün nokta-i nâ-çîz hasr-i devr-i meydânı

 6. İder çün katre-i emvâc-i sîm-âb âb ile bâda

 Ser-â-pâ ra’şe-hîz-i bî-karârî reh-neverdânı

 7. Sipihr-i nüh-kıbâbı şu’le-cûş-i ıztırâb eyler

 Misâl-i hâr ü has âteş-revânun bâd-i dâmânı

 8. Kebâbâsâ döner ser-geşteler sîh-i mahabbetde

 İdüp pâdan güzer serden çıkar hâr-i mugaylânî

 9. Şebi hem-reng-i âh-i teşnegân-i el-’ataş-gûyân

 Sabâhı tûde-i hâkister-i güm-kerde-râhânî

 10. O deşt-i cân-güdâza pâ-nihâde olmak istersen

 Seri çün şu’le-i şem’ eyle pâyı berk-i cevlânî

 31

 11. Fetîl-i şu’le-tâb-i râhı pây-i istikâmetle

 Gönül kat’ itdi çün mikrâze-i şem’-i şebistânî

 12. İrişdi bir sevâd-i a’zam-i nâ-dîde-etvâra

 Ki seng-i sürmeden tertîb olunmış tarh-i bünyânı

 13. Misâl-i sohbet-i işrâkıyânî güft-gûlar hep

 Hamûş-i ser-be-ceyb-i hayret-i dîdâr sükkânı

 14. Harîdâr olmada sûdâgerânı nakd-i cân der-kef

 Metâ’-i derdi bâzâr itmede kâlâ-fürûşânı

 15. Resîde oldı nâ-geh çeşmi bir gülzâr-i ra’nâya

 K'ider nev-bâve-çîn-i bâg-i hayret seyr Rıdvânı

 16. Güli dâg-i derûn ü sünbüli dûd-i dil-i ‘âşık

 Dıraht âlûde-i hûn-i ciger çün şâh-i mercânî

 17. Nesîm-i cân-fezâsı feyz-i enfâs-i Mesîhâyî

 Reg-i bûy-i güli mevc-i nigâh-i mâh-i Ken’ânî

 18. Siyeh hâki sevâd-i çeşm-i meh-tâb-i tecellâyî

 Cebîn-i cûybârı çîn-fürûş-i âb-i hayvânî

 19. O bâg-i feyz-bahşun bâgbânı cevher-i evvel

 Bihîn-fihrist-i Kur’ân-i mübîn evrâk-i agsânı

 20. Olup ser-germ-i sahbâ-yi hakîkat pây-i pîşinde

 Dil-i hayret-zede gül-geşt iderken ol gülistânı

 21. Nümâyân oldı bir kâh-i mu’allâ dîde-i câna

 Garîk-i nûr-i vahdet yek-sere meclis-nişînânı

 22. Güşâde revzeni la’l-i tebessüm-rîz-i havrâveş

 Der-i meftûhı gûyâ ‘âşıkun çâk-i girîbânı

................

(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ  DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0