KASİDE: Na't-i Şerîf

21.07.2017

[KASİDELER]

Na't-i Şerîf

mefâ’ilün fe’ilâtün mefâ’ilün fe’ilün

1. Olınca perde-ber-endâz-i nazra çeşm-i şühûd

Görindi âyine-i dilde çihre-i maksûd

2. Dil oldı garka-be-nûr-i müşâhedât-i cemâl

Temevvüc eyledügi demde bahr-i 'aşk-i vedûd

3. Ne ‘aşk bâ’is-i hestî-i âferîde-i gayb

Ne ‘aşk ‘illet-i îcâd-i ‘âlem-i meşhûd

4. Ne ‘aşk neşve-i evvel zuhûr-i rûz-i elest

Ne ‘aşk mebde’-i hilkat ma’âd-i sırr-i vücûd

5. Ne ‘aşk nâtıka-pîrâ-yi rûh-i insânî

Ne ‘aşk sırr-i heyûlâ-yi Âdem-i mescûd

6. Ne ‘aşk mıskal-i âyîne-i dil-i ‘âşık

Ne ‘aşk mâhî-i jeng-i hevâ-yi nefs-i ‘anûd

7. Ne ‘aşk emti’a-i çâr-sûy-i hayrânî

Ziyân-kârî-i rüsvâyî ana mâye-i sûd

8. Ne ‘aşk mûcib-i güstâhî-i Züleyhâyî

Ne ‘aşk ‘ismet-i dâmân-i Yûsuf-i mevdûd

9. Ne ‘aşk âfet-i îmân-i şeyh-i San’ânî

Ne ‘aşk dîn-şiken ü kıble-bend-i küfr-efzûd

10. Ne ‘aşk mâşıta-i haclegâh-i bîdârî

Ne ‘aşk perde-der-i bezmgâh-i çeşm-i rukûd

11. Ne ‘aşk sûziş-i te’sîr-i hâletindendür

Şerer-feşân negamât-i ney ü terâne-i ‘ûd

12. Ne ‘aşkdur bu ki ser-mâye-i hakîkatdür

Bununla fehm olunur remz-i gâmız-i maksûd

13. İfâza-bahşî-i hâlât-i ‘aşkdur ey dil

Hezâr-i bâgda hûnîn terennümât ü sürûd

14. ‘Akîk-pâre-i mahrûtî-i zebânumda

Bu âb ü tâb-i suhan oldı ‘aşkdan mevcûd

15. Surâdıkât-i suhandan ‘arâ’is-i ma’nâ

Te’âvün-i gam-i ‘aşk ile oldı çihre-nümûd

16. ‘Ale'l-husûs ki ilhâm-i vâridât-i nu’ût

Derûna ‘aşk ile oldı şeref-pezîr-i vürûd

17. Ne na’t na’t-i şerîf-i habîb-i Yezdânî

K'odur şefî’-i cemî’-i güneh dem-i mev’ûd

18. Hudâygâne-i (?) halvet-serây-i kurbiyyet

Hıdîv-i mülk-i nübüvvet şeh-i ferişte-cünûd

19. Emîn-i vahy-i İlâhî Muhammed-i ‘Arabî

Fürûg-i çeşm-i dü-’âlem hulâsa-i mevcûd

20. Kemâl-i zâtına munzam hakâyık-i eşyâ

‘Ulüvv-i şânına muhtas şu’ûn-i fıtrat-i bûd

21. Zuhûr-i cevher-i ferd-i vücûdıdur bi’z-zât

Bedâyi’-i ‘araz-i mümkinâtdan maksûd

22. Çü nokta-kâr-i nuhustîn-i halka-i pergâr

Vücûdıdur sebeb-i devr-i çerh-i nâ-âsûd

23. Yazınca levhe kalem nîstî vü hestin olur

‘Adem ‘adem diyü mihrâb-i lâya ser-be-sücûd

24. Misâl-i ed’iye-i müstecâb o cism-i latîf

Nüh âsmânı geçüp lâ-mekâna itdi su’ûd

25. Ser-i mübârekine ebri sâyebân itdi

Habîbini sakınur çeşm-i mihrden ma’bûd

26. Sehâb olmasa fânûs-i şu’le-i hüsni

O şem’-i encümen-i kurbı itse ger meşhûd

27. Tezerv-i mihr-i murassa’-per ü mülemma’-bâl

İderdi sûz ile pervâne gibi mahv-i vücûd

28. Zihî kerîm ki yokdur kemâl-i lutfından

Sevâd-i a’zam-i cûdında iltizâm-i hudûd

29. Şikâr-i şîve-i şeh-bâz-i çeşmi tâ’ir-i kuds

Kemend-i kâküli kerrûbiyâna dâm-i kuyûd

30. Nikâta-i mütezâ’id olursa ger encüm

Muhâsib-i felek olmaz yine rakam-kun-i cûd

31. Olur bidâyet-i sıfr intihâ-yi her asfâr

‘İdâd fazl ü kemâlâtın idemez ma’dûd

32. Güşâde olsa nikâb-i cemâl-i pür-nûrı

Olur eşi’’a-i hurşîd sâye gibi nümûd

33. Nesîm-i nehyi eger olsa mâni’-i cereyân

Olurdı halka-i zencîr-i pâyı mevce-i rûd

34. Tahayyül eylese dil rûy-mâlî-i hâkin

Meşâm-i câna virür dûd-i âh nükhet-i ‘ûd

35. Kemîne-katre-i âb-i şefâ’ati eyler

Şivâz-i nâr-i cahîmi füsürde-tâb-i humûd

36. Nebiyy-i müntahabâ şâh-i Hâşimî-nesebâ

Eyâ şefî’-i güneh-pîşegân-i yevm-i hulûd

37. Kalurdı ketm-i ‘ademde cemî’-i mahlûkât

Sen olmasandı eger ey hulâsa-i mevcûd

38. O demde kim nazar-i pâk-i kibriyâyîden

Olınca nûr-i cebînün hoy-i hicâb-âlûd

39. Çekîde-i katarâtından âferînişde

K'olundı ta’biye-i hilkat-i hakîkat-i bûd

40. Yüzün suyına yaradıldı cümle mevcûdât

Eyâ bihîn-güher-i bahr-i bî-nihâyet-i cûd

41. İder vücûdun ile da’vî-i mübâhâtı

Zemîn sipihr-i berîne zemîne çerh-i kebûd

42. Tahammül eylemedi heybet-i vilâdetüne

Yıkıldı tâk-i bülend-âstân-i turfe-nümûd

43. Basît-i esfel-i hâke fütâde olmaz idi

Cihânda sâye-i ma’dûmun olsa ger mevcûd

44. Sevâd-i dîde-i hurşîd olurdı a’lâda

İzâfet-i bedenünle o cevher-i nâ-bûd

45. Eger olursa terâzû-yi bî-misâlîde

Eyâ habîb-i mu’allâ-serîr-i kurb-i vedûd

46. Güneş melâhatüne hüsn-i pâk-i Yûsuf meh

Dü keffe birisi sîmîn ü biri zer-endûd

………..

ARPAEMÎNİ-ZÂDE MUSTAFA SÂMÎ (Fatma Sabiha KUTLAR OĞUZ )

(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0

Esa

Yorum Yapmak için Kayıt Olun veya Giriş Yapın

Yorumlar

.....

KASİDE: Na't-i Şerîf

Yorumlar

Zehra İnci

7 years ago