Kaside: Sepîde-dem ki fürûg-ı ruh-ı peyâm-ı sürûr
15.09.2017
3
Mefâ‘ilün Fe‘ilâtün Mefâ‘ilün Fe‘ilün
1 Sepîde-dem ki fürûg-ı ruh-ı peyâm-ı sürûr
Cihân-fürûz-ı sımâh oldı çün eşi‘‘a-i hûr
2 Hoşâ peyâm-ı ferah-zâ ki oldı şevkinden
Reg-i semâ‘-ı cihân hem-çü târ-ı şem‘a-i sûr
3 Haber ki neşve-i şevk ile toldı bezm-i cihân
N’ola ayaga urılsa metâ‘-ı câm-ı bilûr
4 Haber ki şevk-i vürûd ile raksa geldi cihân
Ne gûne gerdiş iderse felek bu dem ma‘zûr
5 Cihân bu şevk ile bâg-ı bihişte dönse sezâ
Çü gonca olsa revâ halk hande-rûy-ı hubûr
6 Bu demde zinde degül mürde bile raksândur
Ki döndi rişte-i sâza reg-i dil-i rencûr
7 Bu demde halk-ı cihân nice kâm-bîn olmaz
Ki rû-nümâ ola teşrîf-i hazret-i düstûr
8 Müşerref eyleye devletle sadr-ı vâlâyı
Yegâne âsaf u dâdâr-ı ma‘delet-meşhûr
9 Bahâr-ı bâg-ı kerem serv-i ser-firâz-ı himem
Medâr-ı refh-i ümem ber-güzîde-i cumhûr
10 Nizâm-ı mülk ü düvel nâzım-ı menâzım-ı dîn
Penâhgâh-ı ra‘iyyet girih-güşâ-yı umûr
11 Semiyy-i fahr-i cihân hazret-i vezîr-i a‘zam
K’ider cenâbına nisbetle iftihâr sudûr
12 O kim tenessüm-i hulk-ı latîfi itmişdür
Dimâg-ı ‘âlemi müstagnî-i ‘abîr ü bahûr
13 O kim tasavvur-ı berk-i nigâh-ı hışmı ile
‘Adû çü mûy-ı ber-âteş pür-ıztırâb-ı zârûr
14 O kim terevvuh-ı bâd-ı bahâr-ı lutfından
Bu köhne bâg-ı harâb oldı ser-be-ser ma‘mûr
15 Mübeddel oldı zamânında nûşa nîş o kadar
Suvardı nîşterin engübîn ile zenbûr
16 Murâd eylese ger imtizâc-ı ezdâdı
Bir âşiyânede olurdı bâz ile ‘usfûr
17 Vireydi neşve-i te’Sîr câm-ı meskeneti
Tutardı sâgarı elde dürüst her mahmûr
18 Ger olsa kâbil-i tasvîr sâz-ı a‘tâfı
Olurdı mıstar aŋa târ-ı cebhe-i tanbûr
19 Der-i celâline hidmetle ‘izzet oldı ‘azîz
Vakâr bârgeh-i haşmetinde oldı vakûr
20 Himem mukârenet-i himmetiyle oldı bülend
Kerem muvâfakat-i lutfı ile buldı nüşûr
………………
……………….
Dr. Mehmet KIRBIYIK, KÂTİB-ZÂDE SÂKIB DÎVÂNI, https://ekitap.kulturturizm.gov.tr/Eklenti/10622,katibzade-sakibpdf.pdf?0
Yorum Yapmak için Kayıt Olun veya Giriş Yapın