Ķaśįde-yi Fevrį DernaǾt-ı Ĥażret-i Seyyidü’l-Enbiyā
02.09.2016Ķaśįde-yi Fevrį DernaǾt-ı Ĥażret-i Seyyidü’l-Enbiyā ǾAleyhi’ś-Śalātu
ve’s-selām
MefǾūlü / FāǾilātü / MefāǾįlü / FāǾilün
I
1. Kūy-ı Ĥabįbe bir gice mihmān olam gibi
Hicr āħir oldı vāśıl-ı cānān olam gibi
2. Ħuddām-ı āstānı ayaġına yüz sürüp
Ben bende daħı Ǿāleme sulŧān olam gibi
3. Baş ķoyup āstānına çarħa Ǿurūc idüp
Tā ki ķarįn-i ǾĮsa-yı devrān olam gibi
4. Varup ĥarįm-i cennet-i kūyın idüp ŧavāf
Ekŝer muķįm-i ravża-yı rıđvān olam gibi
5. Giryān idim zamānile hicrānile bu şeb
Esrār-ı dilrübā ile ħandān olam gibi
6. Olup ĥarįm-i kūyına cānile pāsbān
Ĥükm eyleyüp cihāne Süleymān [olam] gibi
7. ǾAyn-ı Ǿināyetile bu ħāke olup nažar
Kuĥl-i cilā-yı dįde-yi aǾyān olam gibi
8. Cūş u ħurūşa başladı deryā-yı luŧf-ı dost
Ey dil sevin ki ġarķa-yı iĥsān olam gibi
[66a] 9. Envār-ı mihr-i yār tecellį idüp bu şeb
Başıma gün ŧoġup meh-i tābān olam gibi
10. Pervānevār āteş-i şevķile per ü bāl
Yaķup enįs-i şemǾ-i şebistān olam gibi
11. Kimdür Ĥabįb didigim ey dil bilür misin
Yā ben ne şemǾ-i şevķile sūzān olam gibi
12. ŞemǾ-i Hüdā vü şems-i Đuĥa māh-ı kāǿināt
Şāh-ı verā-yı bedr-i dücā nūr-ı şeş cihat
II
1. Faħr-i cihān u zuħr-ı zamān şāh-ı kāmkār
Maŧlūb-ı ħalķ-ı Ǿālem ü maĥbūb-ı Kirdgār
2. Deryā-yı cūd u kān-ı vücūd yem-i şühūd
Dürr-i yetįm ķulzüm-i bįsāĥil ü kenār
3. Ħūrşįd-i śubĥ-ı dįn ü sirāc-ı münįr-i şerǾ
Miĥr-i Hüda vü žıll-ı Ħudā māh-tābdār
4. ǾAnķā-yı ķāf-ı ķurb u muķįm-i maķām-ı üns
Dānā-yı rāz u Ǿārif-i esrār-ı bįşümār
5. Ġarrās-ı naħl-i bāġ-ı hidāyet-şümār kim
Didügi gibi virdi ķodı şāħ-ı berg ü bār
6. Ġavvās-ı baĥr-i ķuds ki nįsān-ı ķavl-ı Ĥaķ
Aśdāf-ı gūşın eyledi pür-dürr-i şāhvār
7. Ŧarĥ-efgen-i şerįǾat ü miǾmār-ı ķaśr-ı dįn
Kim ĥaşre dek bināsı anuñ olur üstüvār
8. Vāli-yi Ǿarş u ferş ki kem-ter kemįnesi
Sulŧān-ı Rūm u mįr-i Ħorāsān şeh-i Tatār
9. ǾAbd-i şekūr-ı Ĥaķ ki aña ümmet olmaġın
Ruĥullah oldı çarħ-ı maķām u felek-medār
10. Lev lā istināru şemsi min maŧlaǾi’l-ķadem
Mā eşreķat źekāǿi vemā tenevvere’n-nehār
11. Lev lem yekun vücūdihi maŧlūbı Rabbihi
Len sedde bābu śunǾihi v’aħteleti’d-diyār
12. Ammā śıfātu źātihi lā yudriku’n-nehā
Śallū Ǿale’n-nebiyyi elā eyyühe’l-verā
III
1. Bir demde geçdi Ǿālemi ve māverāsını
Bįşekk ü şübhe gördi cemāl-i Ħudāsını
2. Şaķ itdi bedri şerǾile iŝbāt eyledi
Ħalķ içre iki şāhid ile müddeǾāsını
3. Ŧāvus-ı ķudsi Sidrede pervāz ider henüz
Ol buldı ķurb-ı gülşenünüñ müntehāsını
4. Ħayl-i rusül öñünce yürür Ǿaskerįdurur
Sulŧan odur ki śoñradan açdı livāsını
5. Budur tefevvuķ eyledügi Ǿarş u ferşe kim
Başına tāc idindi anuñ ħāk-pāsını
6. Gerçi yetįm dirler evet şol dür-i yetįm
Kim ħˇācegān bulmadı hergiz behāsını
7. MuǾciz degül mi maĥşer olunca işitdurur
Aķśā-yı deyr-i dehre śadā-yı śalāsını
[66b] 8. Dünyāda āħiretde irişdi murādına
Her kim ki aldı iki cihānda duǾāsını
9. Kim baħşişi faķįre cihān būstānıdur
Ĥātem düşinde görmeye anuñ Ǿaŧāsını
Ben bilmezin Ħudāsı bilür intihāsını
11. Fi’l-cümle ķadrin añlar anuñ gūş-ı hūş iden
Yā eyyühe’r-Resūl ile Ĥaķķuñ nidāsını
12. MecmūǾ-ı mümkināt ŧufeyl-i vucūdıdur
Baĥr-ı dü kevn reşĥa-yı deryā-yı cūdıdur
IV
1. Biñ başım olsa tende vü her başda biñ dehān
Her bir dehānım içre daħı olsa bįn zebān
2. Her bir zebānım anıda söylerse bįn lüġat
Her bir lüġatda eylese biñ menķıbe beyān
3. Her bir beyānda eylese bįn sırrı āşkār
Her yerde itse sırrile bįn maǾnayı Ǿıyān
4. Her maǾna olsa luŧfile bįn remzi müştemel
Her remzi virse laĥžada bįn nükteden nişān
5. Her nükte bįn kitābı eger itse iştimāl
Her bir kitābı eylese bir söze biñ mekān
6. Her bāb içinde olsa biñer faśl münderic
Her faślı daħı eylese bįn mebĥaŝı nihān
7. Her mebĥaŝ içre maŧlabuñ itse biñi žuhūr
Her maŧlab içre biñ ola farżā ki dāstān
8. Her dāstānuñ olsa eger biñ laŧįfesi
Her bir laŧįfe eylese biñ menķıbe Ǿıyān
9. Ħalķ-ı zamāne daħı ķamu baña beñzese
Dįv ü perį vü ĥūr u melek cümle ins ü cān
10. Evśaf-ı źātınuñ yine Ǿöşr-i Ǿaşįrinüñ
Biñde birine açsaķ anuñ da dehen hemān
11. Tā ĥaşr olunca mirǿat-ı Ǿazįz eyleyüp
Taķrįr iderseñ olmaya biñde biri beyān
12. Bilmez kemāl-i źātını anuñ meger Ħudā
ǾAd eylemez śıfātını anuñ meger Ħudā
V
1. Ĥāşā ki bende medĥüñe lāyıķ kelām ola
Yā efđalü’r-rusül saña benden selām ola
2. Aśĥāb u ālüñe ķamu evlāduña daħı
Ezvāc-ı ŧāhirātuña cümle peyām ola
3. Hem tābiǾįn ü çār imām-ı şerįǾate
Gülzār-ı cennet içre civāruñ maķām ola
4. Sulŧān-ı mülk-i dįn Süleymān-ı Ǿālemüñ
ǾÖmri dırāz u salŧanatı berdevām ola
5. Şehzāde vü vezįr ü emįr ile ĥākimüñ
Her biri şerǾüñ içre cihānda benām ola
6. Pįr ü cevān u Ǿālim u Ǿābid ġanį faķįr
Fażl-ı Ħudā vü luŧfuñ ile şād-kām ola
[67a] 7. Dergāh-ı Ǿizzetüñdeki ħuddām-ı siyyemā
Şeyħ ĥarem-i saǾādetile müstedām ola
8. Bāb-ı saǾādetüñde olan ķara ķuluña
Fevri-yi rū-siyāh kemįne ġulām ola
9. Ǿİlm-i şerįǾatüñde edįb-i lebįb olup
Fenn-i ŧarįķatüñde imām-ı hümām ola
10. Bezm-i muĥabbetüñde ķulūb-ı baǾd ezįn maķām
Destinde cām-ı bāde-yi Ǿışķuñ müdām ola
11. ǾIşķuñla āħir eyleye Ǿömrini śoñ nefes
Her eksügi şefāǾatüñ ile tamām ola
12. Yā raĥmet-i Ħudā kerem eyle Ǿināyet it
Dergāh-ı Ĥaķda cürmüme yarın şefāǾat it
Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012
0
0
Yorum Yapmak için Kayıt Olun veya Giriş Yapın