Kevn ü mekândan geçeniñ
06.06.2016
Kevn ü mekândan geçeniñ
Menzili ‘arşu’llâh olur
Yokluk meyinden içeniñ
Varlıgı kenzu’llâh olur
2 Her kim ki ister yârını
Bıraksın elden varını
Gören dostuñ dizârını
Bugün fenâ-fi’llâh olur
3 İren fakrıñ tamâmına
Kanar vuslatıñ câmına
Fenâ-fi’llâh makâmına
Ulaşan mahvu’llâh olur
4 Her kim ki terk-i cân olur
Bir cânına biñ cân olur
Nefsini fehm eyler bilür
Hem ‘ârif-i bi’llâh olur
5 Berzah iliniñ âfeti
Pür-nûr olur şekâveti
‘Âşıklarñ ziyâreti
Oldur ki beytu’llâh olur
6 Bulan bu ‘aşkıñ dadını
Keşf eyler ‘ilm-i bâtını
Mukarreb eyler adını
Hâl-ile ehlu’llâh olur
7 Maksûdımuz öñden soña
Budur ki dirüm ben saña
Sırdur seni viren aña
Tevhîd-i zâtu’llâh olur
8 ‘İlm ü ‘irfân olur sözi
Sırr-ı Furkân olur özi
Her kande kim bakar gözi
‘Ayn-i kudretu’llâh olur
9 Bilmez olur solın sagın
Seyrân ider dôstuñ bâgın
Anca tuyar cân kulagın
Hıtâb-ı sırru’llâh olur
10 Bî-nişândur soyladıgı
Lâ-mekândur yayladıgı
Dâ’im dilde söyledigi
Ol küntü kenzu’llâh olur
11 Kanda kim var hak meydânı
Almayalar degme cânı
Zirâ ki her cân mülkünü
sanma ki ‘aşku’llâh olur
12 Şol cân ki ‘aşkıñ yiridür
Kâmil gerekdür arıdur
Kâmil ki şol ‘aşk eridür
Dâ’im işi Allâh olur
13 Ümmî Sinânıñ irdügi
Cânını kurbân virdügi
Dâ’imâ anuñ gördügi
Cemâl-ı zâtu’llâh olur
Doç. Dr. A. Azmi BİLGİN,ÜMMÎ SİNAN DİVANI,K.veTurzm.Bak.,ekitap.kulturturizm.gov.tr
