Kim ola gülşen-i ‘âlemde safâdan mahrûm
16.09.2017
407
Fe‘ilâtün Fe‘ilâtün Fe‘ilâtün Fe‘ilün
1 Kim ola gülşen-i ‘âlemde safâdan mahrûm
Beŋzer ol bülbüle kim berg ü nevâdan mahrûm
2 Per-i pervâne yeter bâd-zen-i âfet ola
Şem‘-i ikbâl ki fânûs-ı du‘âdan mahrûm
3 Olsa gırbâl kadar dîdesi nef‘in göremez
Hırmen-i lutfını kim ide gedâdan mahrûm
4 Hoş-nümâ gül-bün-i bî-bülbüle beŋzer bî-şek
Hod-nümâyân-ı cihân k’ola Senâdan mahrûm
5 ESeri kâle-i düzdîde-veş anuŋ kim olur
K’ola dellâl-ı Senâ-yı şu‘arâdan mahrûm
6 Tûtî vü zâg mezâkında anuŋ yek-sândur
Kim ola zevk-i nükât-ı bülegâdan mahrûm
7 Sürme-i terbiyet ol merd-i nazar-bâza sezâ
K’olmaya kûr gibi kuhl-ı cilâdan mahrûm
8 Çihre vü dîde-i mahbûs gibi zerd ü sefîd
Sîm ü zer kim kala der-kîse ‘atâdan mahrûm
9 Beŋzer ol matbah-ı bî-dûd u meges-nâ-dîde
Ola ol hân-ı ‘atâ kim fukarâdan mahrûm
10 Vakf iden merhem-i en‘âmını bî-çârelere
Olmaya hîç dü ‘âlemde devâdan mahrûm
11 SÂKIB ümmîd-i merâm eyle der-i Hak’dan kim
Anda hîç olmadı bir kimse recâdan mahrum
Kırbıyık, Mehmet. Kâtib-zâde Sâkıb Dîvânı. https://ekitap.kulturturizm.gov.tr/dosya/1-275466/h/katibzade-sakib.pdf [erişim tarihi: 01.05.2013]
