Kızıl Elmada Görenler Mehçe-i Sancâgunı
27.02.2017
Kızıl Elmada Görenler Mehçe-i Sancâgunı
Kızıl Elmada görenler mehçe-i sancâgunı
Sandı sîb-i müslimîdür ki nihâl üstindedür
Surh-ser oklı şikârundur serinde nâvekün
Şâhin-i deşt-i gazâdur ki gazâl üstindedür
Virse n’ola cân-ı şîrîni gören nîzende baş
Her biri bir şekl-i Hüsrevdür nihâl üstindedür
Kelle-i a’dâda yir yir zahm-ı gürz ü şemşîrün
Tâze açılmış karanfildür sifâl üstindedür
Nâhun-ı peykânun eyler ‘ukdesin hal düşmenün
Mîm-veş başı girihdür ki melâl üstindedür
Arasın kessin okun gönder yâhûd tîgini sal
Cism ü cânı kâfirün ceng ü cidâl üstindedür
Keff-i cûdun hüsrevâ bir nehr-i sâ’ildür senün
Mevclerdür hatları âb-ı zülâl üstindedür
Elleri seng-i sitemden şimdi taş altındadur
Rahm iderdün ‘Âşıkı görsen ne hâl üstindedür
