Kuhl-ı İnsâf İt ‘Atâ Dil Çeşmini Ac Eyleme
27.02.2017
Kuhl-ı İnsâf İt ‘Atâ Dil Çeşmini Ac Eyleme
Kuhl-ı insâf it ‘atâ dil çeşmini ac eyleme
Cânı tîr-i mihnet-i nâdâna omac eyleme
Mülk-i ‘ırzı ‘asker-i zılletle târâc eyleme
Yâ İlâhî ‘Âşıkı nâ-merde muhtâc eyleme
Seng-i gam fazl ehlinün dest-i cefâsından bana
Yeg gelür nâ-dân olanun merhabâsından bana
Behre ihsân it kanâ’at kimyâsından bana
Yâ İlâhî ‘Âşıkı nâ-merde muhtâc eyleme
Lutfunı Hızr it kanâ’at çeşme-i hayvanına
Âşinâ eyle tevekkül lücce-i ‘ummânına
Her denînün dökme yüzüm suyını dâmânına
Ya İlâhî ‘Âşıkı nâ-merde muhtac eyleme
Himmetüm şâhâne it suretde dervîşâne kıl
Merd-i meydân-ı tevekkül olmada merdâne kıl
Genc-i istignâya dil ma’mûresin virâne kıl
Yâ İlâhî ‘Âşıkı nâ-merde muhtâc eyleme
Sifle-perverdür felek erkân-ı devlet dûn-nevâz
Fâyide itmez çok olmak ehl olanda hırs az
Bî-Niyâzâ ‘Âşıkı gayründen eyle bî-niyâz
Yâ İlâhî ‘Âşık’ı nâ-merde muhtâc eyleme
0
1
Yorum Yapmak için Kayıt Olun veya Giriş Yapın