Mahabbet şâhı kim kasrına çarhı âsitân itmiş

Mefâ‘îlün Mefâ‘îlün Mefâ‘îlün Mefâ‘îlün(1)

 

1. Mahabbet şâhı kim kasrına çarhı âsitân itmiş

 Ser-i erbâb-ı dilden pâye pâye nerdübân itmiş

2. Görüp miskîn saçın ey cân-ı miskîn genc-i vasl umma

 O bir câdû imiş kim sihr ile kendün yılan itmiş

3. Yüzüñ mihrinde rûşendür güneşden sâni‘üñ sun‘ı

 Ki anda zerre-i nâçîz idüp bunda dehân itmiş

4. Mahabbet deşti içre lâle Mecnûnuñdur ey Leylî

 Degül dâg-ı siyeh başında bir zâg âşiyân itmiş

5. Müneccim dirdi gerçekden hilâl-i münhasif olmaz

 O mâh Emrî kaşıyla gerçegin anuñ yalan itmiş

 

 

Prof. Dr. Mehmet A. Yekta SARAÇ, EMRÎ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3144 KÜLTÜR ESERLERİ 427