Melâhat âsmânında bugün bir mâh-tal‘at var

186

Mefâ‘îlün/ Mefâ‘îlün/ Mefâ‘îlün/ Mefâ‘îlün

 

Melâhat âsmânında bugün bir mâh-tal‘at var

Mesîhâ’dan haber îmâ ider Hurşîd-haslet var

Beni kûyuñda gördükçe anuñçün saña gamz eyler

Rakîbüñ kalb-i nâ-pâkinde sultânum habâset var

Gelüp geçdikçe sînemden deler düşmenlerin bagrın

Kemân-ebrû güzelsin sen senüñ tîrüñde cür’et var

Rakîbüñ gözleri dün ‘îdgehde gitmedi bizden

Anuñ ol ugrun ugrun bakışında hoşca hâlet var

Niçün pâ-mâl olur kûyumda dirseñ cur‘aveş Ravzî

Ayaguñ tozına yüzin sürer başında devlet var

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009