Melâhat burcına olsa eger şemsü’d-duhâ ‘avret

 

Mefâ‘îlün/ Mefâ‘îlün/ Mefâ‘îlün/ Mefâ‘îlün

 

Melâhat burcına olsa eger şemsü’d-duhâ ‘avret

Ne mümkindür dil-i târîkümi rûşen kıla ‘avret

Uyarsañ sözine eyler mekânuñ âteş-i dûzah

‘Aceb bu hâl ile bilsem niçe cennet bula ‘avret

Perî-sûret melek-sîret güzeller vâr iken sûfî

Neden zen-pâre olduñ sen ne sihr itdi saña ‘avret

Eger bir kerre üf dirseñ düşer arkası üstine

Cihânuñ pehlevânıdur öbür işden yaña ‘avret

Sakın âl eyler aldanma görüp dest-i mühennâsın

Melek olsa da sihr eyler hazer kıl Ravziyâ ‘avret

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009