Çünki bi’smi’llā’hi’r-Raĥmāni’r-Raĥįm

Oldı hādį-i śırāŧ-ı müstaķįm

Anuñ ile eyledük fetĥ-i kelām

Cümle nāķıś sözler ola tā tamām

İbtidā añılsa nām-ı Źü’l-celāl

Ol işe mervį budur gelmeye bāl

Ol-durur ism-i şerįf ü ism-i źāŧ

Ol-durur müstecmiǾ-i cümle śıfāt

5 5 Źikr-i ismi dillere virür cilā

Fikr-i źātı cānlara virür śafā

ǾĀlim ü Ĥayy u SemįǾ ü Ķādir ol

Žāhir ü bāŧın her işe nāžır ol

Māsivāsı mümkin ol vācib hemįn

Rāzıķu’l-maħlūk Rabbü’l-ālemįn [2a]

 

Hem irādet hem meşiyyet hem ķıdem

Oldı źātına śıfāt-ı muĥterem

Lā-hüve lā-ġayrühüdür ehl-i Ĥaķ

Bu śıfāt-ı sebi ķılmaz hįç farķ

Ne Ǿaraż ne cism ü ne madūddur

Ne muśavverdür ne ħod maĥdūddur

Ehl-i Ĥaķ cevher daħı dimez aña

Kim terekküb źātda olmaz revā

Aña hem cārį degül aślā zamān

Źātına tayįn olınmadı mekān

Bulmadı baż-ı tecezzį aña rāh

Hem tenāhįden münezzehdür İlāh

Hįç māǿit ile mevśūf olmadı

Hįç keyfiyyetle maǾrūf olmadı

Yoķ şebįhi kendi źātı bį-nažįr

ǾAķl künhinden degül aślā ħabįr

Muĥdeŝātından olan ehl-i yaķįn

Dir hemįşe lā uĥubbü’l-āfilįn

 

Ĥādiŝüñ her źerresi bį-iştibāh

Birligine Ĥażret-i Ĥaķķ’uñ güvāh

Vāĥidiyyet menşeǿidür vaĥdeti

Oldı hem mirǿāt-ı vaĥdet keŝreti

Bāŧın u žāhirde vaĥdet rābıŧa

Evvel ü āħirde vaĥdet vāsıŧa

Vaĥdeti iŝbāt içün ol Śamed

Emr ķıldı ķul hüve’llāhu aĥad

 

Oluban vaĥdet ināyetden ayān

Oldı muayyen hidāyetden cihān

Vaĥdeti vaĥdetine malūm ider

Keŝret-i ayān yine madūm ider

Çün muvaĥĥid ide isķāŧ-ı śıfāt

Çeşmine görinmez illā nūr-ı źāt

Nūr-ı vaĥdet ķalbine virür śafā

Bulur ol nūr ile mirātı cilā

Hem kelāmı ġayr-ı maħlūķın delįl

İdinüp bula viśāline sebįl [3a]

 

On sekiz biñ āleme mirāt olur

Cümle ālem aña hep āyāt olur

Çün muĥaķķıķda ola ayn-ı şühūd

Görinür āŝārdan nūr-ı vücūd

 

……….

Ramazan EKİNCİ, BEHİŞTÎ AHMED SİNAN’IN MEVLİD-İ ŞERÎFİ, https://www.sufiarastirmalari.com/dergi/14823-11-20140-55-464-Ramazan_Ekinci_17-79.pdf