Mu’aşşer Terkîb-i Bend Berây-i Sultân Ahmed-i Sâlis
21.07.2017
Mu’aşşer Terkîb-i Bend
Berây-i Sultân Ahmed-i Sâlis
mef’ûlü fâ’ilâtü mefâ’îlü fâ’ilün
I
1. Demdür ki eyleye kalem-i râstîn-sıfât
Seccâde-i sahîfede kad kâmeti's-salât
2. Demdür ki ide mahfil-i ser-levhada sücûd
Nûr-i siyâha gark ola halvetgeh-i devât
3. Demdür ki dâne-i nukat-i ‘anberînden
Silk-i beyâna nazm ide tesbîh-i vâridât
4. Demdür ki çâk idüp yakasın giryenâk iken
Şerh ide mâ-cerâ-yi dilin ol bihîn-simât
5. Allâhu ekber ile menâr-i benânda
Ser-germ-i zikr ola çü Bilâl-i sütûde-zât
6. Eşk ile dest-şûy-i vuzû-yi niyâz olup
Her katresi isâle-i feyz ide çün Furât
7. Oldukça dûr-bîn-be-kef-i nazra-i şühûd
Nezdîk ola nigâhına semt-i mugayyebât
8. Pîçîde-pây-i lîka-i huşk-i devât olup
Baglanmaya o çâpük-i sahrâ-rev-i nikât
9. Şâhîn gibi dü-mısra’-i beyti idüp cenâh
Böyle ide me’âric-i da’vâta iltifât
10. Yâ Rab be-hakk-i mâ-sadak-i r*I¼« Ë Êuì
Mansûr ola o şâh-i cihân-i zafer-’alem
II
1. Bir şeb ki dîdeden açılup perde-i rukûd
Mir’ât-i dilde oldı ‘ıyân pertev-i şühûd
2. Teşmîr-i sâk-i himmet idüp şâhid-i hayâl
Sahrâ-yi kalbi gezdi ser-â-ser bilâ-hudûd
3. İkbâl idüp mübeşşir-i ilhâm-i Îzidî
İtdürdi cânı zirve-i tahkîke dek su’ûd
255
4. Nâ-gâh bir fezâ-yi vesî’ oldı âşkâr
Gördüm ki saf-keşîde turur bir nice cünûd
5. Bu ceyş-i bî-had ile bu vâdî nedür didüm
Didi ki ey habîr-i mezâyâ-yi her nümûd
6. Cem’-i teveccühât-i kulûb-i ricâl-i gayb
Deşt-i ‘inâyete ider imdâd içün vürûd
7. Tasdîk idüp makâlini şükrâne eyledüm
Pîşânî-i niyâzı fürû-bürde-i sücûd
8. Sürdüm yüzüm zemîn-i ‘ubûdiyyete o dem
Feryâd idüp didüm ki eyâ vâcibü'l-vücûd
9. Nüşşâbe-i du’âmı be-nûr-i nebiyy-i seyf
Eyle resîde-i hedef-i târem-i kebûd
10. A’dâ-yi dîn ü devlet olup münhezim müdâm
Ceyş-i muvahhidîn ola nusretle şâd-kâm
III
1. Ey nâzım-i merâtib-i saf-der-saf-i nücûm
Revnak-fezâ-yi ‘âlem-i hestî ‘ale'l-’umûm
2. Merbûtdur sipeh-bud-i a’yân-i ilmüne
Bu tîh-i bî-kerânda olan leşker-i ‘ulûm
3. Sensin iden bu ‘arbedegâh-i hayâlde
Ezdâd-i kâ’inâtı neberd-âver-i hücûm
4. Şîrîn ü telh ü âteş ü âb ü zalâm ü nûr
Ceng üzredür cihânda çü şâdânî vü gumûm
5. Bu köhne-kâr-hâne-i nâ-ber-karârda
Hep böyledür vetîre-i dîrîne-i rüsûm
6. Her demde inkılâbdadur beyne usbu’eyn
Sükkân-i hıtta-i ‘Arab ü merdümân-i Rum
7. Ey hayy-i bî-zevâl ü kadîr-i bilâ-misâl
Destündedür tasarruf-i her mülk ü merz-bûm
8. Senden niyâzumuz budur ey fâtırü's-semâ’
Mülk-i ‘adû harâb ola çün âşyân-i bûm
9. Dûd-i siyâh-i top ü tüfeng ile düşmeni
Eyle remâd-i dûzah-i idbâr çün semûm
10. Gâlib idüp ‘adûsına sultân Ahmedi
Artur hemîşe şevket-i dîn-i Muhammedi
256
IV
1. Sultân-i kâm-rân ü hudâvend-i bî-nazîr
Dâdâr-i Cem-nişân ü şeh-i âsmân-serîr
2. Sâhib-kırân-i ‘âlem ü hâkân-i ced-be-ced
Şâhenşeh-i mü’eyyed ü leşker-keş-i dilîr
3. Ârâyiş-i erîke-i câh ü şükûh kim
Çün gürbedür vakârına nisbetle nerre-şîr
4. Zıll-i Hudâ halîfe-i sultân-i enbiyâ
Ser-tâc-i evliyâ ‘alem-efrâz-i dâr ü gîr
5. İcrâ-yi âyet-i ’UBI¼« v§ rJ¼Ë idüp
Âb-i hayât-i tîg ü yerâ’ayla nâ-güzîr
6. ‘Ahdinde ol Sikender-i mülk-i ‘adâletün
Her sâl olur Hızr gibi nev-rüste çerh-i pîr
7. Mîzâb-i ‘adl ü dâd biri biri cûy-i lutf
Tîg ü kalemle eyleyüp ihsânını kesîr
8. Buldı tamâm-i ravza-i dîn ü düvel suyın
Hakkâ kim oldı bâg-i şerî’at nemâ-pezîr
9. Deryâ gibi cüyûşın anun pür-hurûş idüp
Bâd-i vezân-i nusret ile kâdir ü nasîr
10. Hem-çün nümâyiş-i has ü hâr ü habâb ü kef
A’dâsı muzmahil ola dâ’im taraf taraf
V
1. Yokdur nazîr pâdşeh-i kâm-rân olur
Şeh-râh-i saltanatda ana hem-’inân olur
2. Pîrâye-bahş-i taht-i asâlet ki dergehi
Mâlişger-i nevâsî-i gerden-keşân olur
3. Mevrûsdur hilâfeti ecdâd-i pâkden
Kim her biri şehenşeh-i sultân-nişân olur
4. Hâkân-i Çîn ü hân-i Hıtâ şâh-i Hind ü Sind
Hâk-i rehinde sûde-cebîn-i hevân olur
5. Ol yekke-tâz-i deşt-i celâdet ki rahşınun
Sâ’is gulâmı Eşref-i Efgâniyân olur
6. Nezd-i hıredverân-i ‘avâkıb-şinâsda
Bu da’vî-i hakîkatümüz bî-gümân olur
257
7. Tâ rûz-i haşr mazhar-i tevfîk-i Hak tamâm
Şâhân-i hânevâde-i ‘Osmâniyân olur
8. Efgâniyân emîri o bâgî-i bî-şeref
Kulluk iderse yahşı vü illâ yaman olur
9. Kahr eyleyüp vücûdını Allâhu zü'l-celâl
Bagy itdügi içün işi âh ü figân olur
10. Çeksün keşef misâl serin ceyb-i hırkaya
Karışmasun sınarı kızılbaş fırkaya
VI
1. Kendin ne zann ider o beyâbân-nişîn-i gûl
Bâgî vü tâgî oldugın anmaz o bü'l-fudûl
2. Etrâf-i Kandehârda mûr ü meges gibi
Bulmakla kand-i matlaba bir iki gün vusûl
3. Hâlî kalup kalem-rev-i Îrân nifâk ile
İtmekle Isfahânı fakat merbat-i huyûl
4. Ol sûret ugrısı mütekavvil dürûg-gû
Şeh-râh-i müstakîmden itmiş iken ‘udûl
5. Taglît ile girîve-i bagy ü fesâdda
Dâ’im mudill ü dâll olur iken misâl-i gûl
6. Halk-i miyân-i rîş-i zekân cem’-i uhteteyn
K'oldı şi’âr-i şirzime-i rafz-i bî-usûl
7. Fart-i teşeyyu’ ile o kâr-i şenî’ayı
Mesmû’ iken tevâtür ile itdügi kabûl
8. Bî-hûde iddi’â’-i tesennün çi fâ’ide
Evzâ’-i hod mesâbe-i İbni Ebî Selûl
9. Bâtıl ola celâl-i Hudâ-yi ‘alîm ile
Hak sûretinde eyledügi şîve-i cehûl
10. İşte görür ne gûne imiş şimdi ceng ü harb
İrsâl-i leşker itdi şehenşâh-i şark ü garb
VII
1. Her sûdan akdı leşkeri seyl-i revân gibi
Cûş eylemekde mevc-i yem-i bî-kerân gibi
2. Me’mûlümüz budur ki esüp bâd-i lutf-i Hak
Çok beldeler musahhar olur Isfahân gibi
258
3. Olsa gerek zamîme-i mülk-i şeh-i cihân
Kazvîn ü Meşhed ü Kum ü Rey ü Revân gibi
4. Fevc-i cünûd-i pâk-sürûşân bu def’a da
Bî-şek hücûm ider sipeh-i sünniyân gibi
5. Zîrâ ki kam’-i rafza şehenşâh-i ‘âlemün
Der-kârdur teveccühi sâhib-kırân gibi
6. Ber-muktezâ-yi fetvî-i şer’-i peyem-berî
Men’-i bugâta himmeti şîr-i jiyân gibi
7. Olmakdadur müşârik-i tedbîri bâ-husûs
Dâmâd-i bî-’adîl-i hıdîv-i cihân gibi
8. Ol sadr-i bî-mu’âdil ü paşa-yi sâf-dil
Düstûr-i ‘âkil Âsaf-i devr-i zamân gibi
9. Ya’nî vekîl-i mutlakı sadr-i muvaffakı
Risto ile Sikender-i kişver-sitân gibi
10. Tedbîrini muvâfık-i takdîr ide Hudâ
Rüşd ü sedâd ü sıdk ü taviyyetle dâ’imâ
VIII
1. Yâ Rab be-nûr-i pâk cebîn-i Muhammedî
Yâ Rab be-çâr-yâr-i güzîn-i Muhammedî
2. Yâ Rab be-ism-i a’zam-i zât ü be-remz-i hay
Yâ Rab be-nakş-i fass-i nigîn-i Muhammedî
3. Yâ Rab be-sırr-i saltanat-i mefharü'r-rüsül
Yâ Rab be-şân-i devlet ü dîn-i Muhammedî
4. Yâ Rab be-kadr-i ref’-i betûl ü be-ehl-i beyt
Yâ Rab be-sıhr-i cây-nişîn-i Muhammedî
5. Yâ Rab be-hakk-i leyle-i mi’râc-i sidre-tâc
Yâ Rab be-sırr-i ‘arş-i berîn-i Muhammedî
6. Yâ Rab be-feyz-i hikmet-i âyât-i beyyinât
Yâ Rab be-hükm-i şer’-i mübîn-i Muhammedî
7. Yâ Rab be-ders-hâne-i vâlâ-yi kurb-i Hak
Yâ Rab be-künh-i ‘ilm-i yakîn-i Muhammedî
8. Eyle kabûl Sâmî-i zârun niyâzını
K'oldur kemîne-’abd-i hazîn-i Muhammedî
9. Sultân-i hâdimü'l-haremeyni muzaffer it
Her kanda varsa hasmını mahzûl ü ebter it
(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0
