Fâ‘ilâtün Fâ‘ilâtün Fâ‘ilâtün Fâ‘ilün
 
1. Mübtelâ-yı firkatem bes çâre ne cân ey tabîb
 Cânıma kâr eylemiş âzâr-ı hicrân ey tabîb
2. Çâk kılgil sîne-i sûzânım içre bağrıma
 Cem‘ olup gör kim nice cân ey tabîb kan ey tabîb
3. Dâğ-ı dildendir mücerred âh gönlüm yoksa kim
 Eylemez bî-dâğ-ı dil feryâd u efgãn ey tabîb
4. Var mı tayyiblerde yâ gördün mi hikmet hânede
 Söylemiş mi derd-i ‘aşka çâre Lokmân ey tabîb
5. Gam bucağında vücûdum pâymâl itmiş firâk
 ‘Ârız-ı gül-çehredir def‘ine dermân ey tabîb
6. Çekmegil bî-câ emek bî-hûde efkâr itme kim
 Çâre-i derd-i dilimdir la‘l-i cânân ey tabîb
7. Eylegil Mîr Nigârî hastenin hâlin suâl
İntizâr-ı makdemindir dîde-giryân ey tabîb
 
SEYYİD MÎR HAMZA NİGÂRÎ
Prof. Dr. Azmi Bilgin , Nigârî [ö. 1885], DÎVÂN, 2011, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ, 3289 KÜLTÜR ESERLERİ 482