MUHAMMES 1 Âfitâb-ı burc-ı hüsnem kimse yok hem-ser baña

 

MUHAMMES

1

Fâ‘ilâtün/ Fâ‘ilâtün/ Fâ‘ilâtün/ Fâ‘ilün

 

Âfitâb-ı burc-ı hüsnem kimse yok hem-ser baña

Hıdmetümde mihr ü meh her rûz u şeb çâker baña

Meclis-i cân-bahşum içre mâh-ı nev sâgar baña

Bir şehenşâham melâhat tâcıdur efser baña

Pâdişâh-ı mülk-i hüsnem pür-cefâ dirler bana

 

Niçe ‘âşık yoluma harc itdi gerçi mâ-melek

Tîr-i hicrânumla deldiler hemân ancak yürek

Rûy-ı mehtâbumla hergiz rû-be-rû olmaz melek

Dâ'imâ kutb-ı murâdum üzre devr eyler felek

Pâdişâh-ı mülk-i hüsnem pür-cefâ dirler bana

 

Bir meh-i nâ-mihrbânum kimseye yok şefkatüm

Dâ'imâ cevr ü cefâ itmek olupdur ‘âdetüm

Cevr ile dünyâyı yakup yıkmaga var kudretüm

‘Âşık öldürmek benüm kim pîşüm ednâ san‘atum

Pâdişâh-ı mülk-i hüsnem pür-cefâ dirler bana

 

Kâmetüm Tûbâ lebüm Kevser zebânum selsebîl

‘Âşık-ı sâdıklara la‘lüm zülâlidür sebîl

Hüsn-i bî-hemtâmı görürse melek olur hacîl

Zülfümüñ her bir kılında baglıdur yüz biñ ‘alîl

Pâdişâh-ı mülk-i hüsnem pür-cefâ dirler bana

 

Vây aña kim kıla anı çeşm-i bîmârum sakîm

Derd-i bî-dermânı tîmârına ‘âcizdür hakîm

‘Âşıka hışm ile kahr itmekde akrânum ‘adîm

İtdüm ey Ravzî göñüller mülkini pür-şûr u bîm

Pâdişâh-ı mülk-i hüsnem pür-cefâ dirler baña

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009