Muhammes-i Gazel-i Emrî Çelebî

 

Fâ`ilâtün Fâ`ilâtün Fâ`ilâtün Fâ`ilün

1

1 Zâhide kûyuñ unutdurdı behiştüñ meskenin

2 Hâsılı virdüñ hevâya sabr-ı `âşık hırmenin

3 Şîven ile arturursın `andelîbüñ şîvenin

4 “Vaz` idelden bâg-bân-ı sun` hüsnüñ gül-şenin

5 Hâr-ı gayret güllerüñ sad-pâre kılmışdur tenin”

2

1 `Âşık olan cân virür ol mâh-ı ruhsâr üstine

2 Muttasıl tañ mı düşerse derd-i düş-vâr üstine

3 Şevk-i rûyuñla düşer pervâneler nâr üstine

4 “Gül gam-ı haddüñle düşmiş hançer-i hâr üstine

5 Gül-şen içre kan bulaşık buldılar pîrâhenin”

3

1 Bu ne hikmetdür ki Bârî nûr u zulmet halk ider

52

2 Bu ne kudretdür ki `âlem zulmet iken ser-be-ser

3 Kâinâta nûr bahş olmaga nâ-geh gün togar

4 “Gün togar sanmañ melâik hâne-i çerhüñ seher

5 Âfitâbı hüsnüñe karşu açarlar revzenin”

4

1 Hasret-i haddüñle gitdi dün gice benden sürûr

2 Derd-i dilden âh idüp oldum ziyâde bî-huzûr

3 Kıldı âhum sarsar-ı çerh-i mu`allâdan `ubûr

4 “Gördi kasr-ı dehrde âhum yelinden söyinür

5 Eyledi hâle çerâg-ı mâha perde dâmenin”

5

1 Hasret-i Şîrîn ile kûh-sâra `azm itdi seher

2 Yâd idüp derd-i derûnın dilden âh itdi meger

3 Âhı bünyâdı serây-ı `âleme virdi zarar

4 “Gördi kim her dem sütûn-ı hâne sûzından yanar

5 Bî-sütûn itdi varup Ferhâd-ı miskîn meskenin”

6

1 Eşk-i çeşmüm `aks-i la`l-i dil-sitândan sürh olur

2 Sînede kalb-i hazînüm dahı andan sürh olur

3 Dilde peykân-ı müjeñ dirseñ ki kandan sürh olur

4 “Sanma kim peykân-ı gamzeñ dilde kandan sürh olur

5 Âteş-i gam tâbıdur anuñ kızardan temrenin”

7

1 Subh-dem derd-i firâk-ı yâr ile âh eylesek

2 Âh-ı mazlûmânedür `arşa güzâr itmek gerek

3 Gâ’ib olur gûyiyâ andan firâr eyler melek

4 “Sañma encüm tîr-i âh-ı Emrî vehminden felek

5 Bile yatur gice egninden çıkarmaz cevşenin”

 

 

 

Dr. Müberra GÜRGENDERELİ, MOSTARLI HASAN ZİYÂ’Î DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3195 KÜLTÜR ESERLERİ