MUHAMMES

 

 Mefâ‘îlüñ Mefâ‘îlün Mefâ‘îlün Mefâ‘îlün I

 

 Tarîk-ı üştür-i mihnetde cismüm pâymâl eyle

 Sıyup ser kâsesin yâ Rab seg-i yâra sifâl eyle

 Diyârum deşt-i sevdâ yârum âhu-yı melâl eyle

 Çü kılduñ zülfini Leylî beni Mecnûn-misâl eyle

 Hudâyâ belki Mecnûndan dahî şûrîde-hâl eyle

II

 Kişiye hôş gelürmiş alsa yâruñ okları cânın

 Hayât-ı câvidân bulurmış emse lebleri kanın

 Velîkîn gamzesi hışm ile dutdukda girîbânın

 Ne kutlu dem-durur ol dem çeküp şemşîr-i bürrânın

 harâmî gözlerüñ diye hemân kanuñ helâl eyle

III

 Gerekse derd ile döñ çeşm-i dilber gibi bîmâre

 Gerekse bahr-i mihnetde yaşum gibi ol âvâre

 Gerek agla gerek iñle gerek düş âh ile zâre

 Ten-i zerd ü nizâr ile irilmez rûy-ı dil-dâre

 Anı ey dil habâb-ı eşk çarhına hilâl eyle

IV

 Yüzi nüh perdedür seyr-i cemâline rızâ virmez

 Yüzini gösterüp çeşm-i cihân-bîne ziyâ virmez

 O gülzâr içre hergiz ‘andelîb-i zâra câ virmez

 Hat-ı reyhân gibi şeb-bûy saçı bûy-ı vefâ virmez

 Gerek aña sebû-yı müşg-tînetden sifâl eyle

V

 Gedâ-yı bî-nevâya sayma kurı server-i ‘aklı

 Eger âbâd idem dirseñ harâb it kişver-i ‘aklı

 Gider dest-i cünûn ile başuñdan efser-i ‘aklı

 Perîşân eyle turmasun yanundan leşker-i ‘aklı

 Libâs-ı ‘ârı ey Emrî seg-i dil-dâra şâl eyle

 

Prof. Dr. Mehmet A. Yekta SARAÇ, EMRÎ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3144 KÜLTÜR ESERLERİ 427