MÜNÂCÂT Vâdî-i ‘ısyâna düşdük kıl ‘inâyet Rabbenâ
22.07.2017MÜNÂCÂT
Remel: Fâ‘ilâtün fâ‘ilâtün fâ‘ilâtün fâ‘ilün
– + – – / – + – – / – + – – / – + –
01. Vâdî-i ‘ısyâna düşdük kıl ‘inâyet Rabbenâ
Mücrim ü ‘âsîlerüz eyle hidâyet Rabbenâ
02. Hâdî-i râh-ı hüdâ ol yolumuzdan azmışuz
Sâliküz göster tarîk-ı istikâmet Rabbenâ
03. Reh-ber et lutfuñ tarîk-ı müstakîme gidelüm
Etme bizi sâlik-i râh-ı dalâlet Rabbenâ
04. ‘Ömrümüz turma hevâ-y-ıla hevesde geçmede
Saña lâyık etmedük hergiz ‘ibâdet Rabbenâ
05. Etmedük hakk-ı ‘ibâdetle ‘ibâdet tapuña
Ma‘rifetde eyledük hayfâ cehâlet Rabbenâ
06. Zulm-i dest-i nefs-i emmâre zebûn etdi bizi
Eylerüz dergâhuña andan şikâyet Rabbenâ
07. Kahramân-ı rûha gâlib oldı ejderhâ-yı nefs
Etdür anı küşte-i kûpâl-i tâ‘at Rabbenâ
08. Zîver-i takvâ-y-ıla ârâste et göñlümüz
Eyle bizi âl-i sultân-ı risâlet Rabbenâ
09. Hilye-i zühd-ile hem de eyleyüp pîrâste
Eyle dâyim peyrev-i şâh-ı velâyet Rabbenâ
10. Sükker-i tevhîdüñi dilde mükerrer edelüm
Her nefesde bulalum zevk-ı halâvet Rabbenâ
11. Rûz u şeb beytü’l-kasîd inşâd edüp tesbîhüñi
Olalum zikrüñle Sahbân-ı fesâhat Rabbenâ
12. Zât-ı pâküñ vasfın evrâk-ı semâvâta yazup
Edelüm tertîb-i dîvân-ı belâğat Rabbenâ
13. Edelüm âsâr-ı sun‘-ı mâsivâñ-ıla senüñ
Zât-ı bî-çûnuñ içün nefy-i hadâset Rabbenâ
14. Âyet-i keyfiyyet-i ihyâ ile hem edelüm
Münkirîn-i haşre isbât-ı kıyâmet Rabbenâ
15. Vasf-ı zât-ı pâküñ oldı احد الله ھو قل
Müşrikîne nass-ı kâtı‘dur bu âyet Rabbenâ
16. Eylerüz nefy-i sivâ tevhîdüñi isbât-ıla
Birligüñe eylerüz dâyim şehâdet Rabbenâ
17. Vâhid ü Ferd ü Samedsin birligüñde şübhe yok
Halk u îcâd-ı sivâ eyler delâlet Rabbenâ
18. Hâliku’l-kevn olduğuña eyledük bî-iştibâh
Nefy ü endâd-ı tevâlüdle işâret Rabbenâ
19. Cürmümüz ikrâr-ıla geldük senüñ dergâhuña
‘Afv-ı zellât eyleyüp eyle beşâret Rabbenâ
20. Fazluñ ile isterüz ‘ukbâda biz gufrânuñı
Vây eger derseñ bize eyle ‘adâlet Rabbenâ
21. Lutf edüp rûz-ı ezelde çün ki geydürdüñ bize
Hil‘at-i tekrîm-ile tâc-ı kerâmet Rabbenâ
22. Eyleme ‘uryân haşr etmekle mahşerde bizi
Lâyık-ı şerm ü sezâ-vâr-ı hasâret Rabbenâ
57
23. Berk-ı hâtif gibi fazluñla Sırât′ı geçelüm
Lutf et ol demde Burâk-ı istitâ‘at Rabbenâ
24. Eyleme biz mücrim ü ‘âsîleri ez-hâsirîn
[Dü cihânda] bize çekdürme hasâset Rabbenâ
25. Mağfiret deryâsına gark eyle biz ‘âsîleri
Yokdur ol deryâ-yı bî-pâyâna gâyet Rabbenâ
26. Kaçduğı gün birbirinden ihve vü evlâd ü zevc
Ol gün ihsân et bize vech-i beşâşet Rabbenâ
27. Nefsî nefsî deñdügi günde Resûl-i ekremüñ
Umaruz kim ede iznüñle şefâ‘at Rabbenâ
28. Dâmen-i ihsânuñı muhkem teşebbüs etmişüz
Umaruz gufrânuñı eyle himâyet Rabbenâ
29. İttihâz etdük ‘adû Şeytân′ı dedüñ çün bize
İmtisâl-i emr-ile etdük ‘adâvet Rabbenâ
30. Ol ‘adû-yı muhtefîden kıl bizi her gâh emîn
Eyle mekrinden anuñ her dem sıyânet Rabbenâ
31. ‘Abd-i ‘âsîdür Beyânî yüz sürer dergâhuña
‘Afv umar eyle anı ehl-i sa‘âdet Rabbenâ
32. Kullaruñı iki fırka etdügüñ günde anı
Eyleme ez-fırka-i bağy u şekâvet Rabbenâ
33. Cennet-i a‘lâda mahrûm-ı visâlüñ eyleme
Her nefes budur du‘âsı kıl icâbet Rabbenâ
Fatih BAŞPINAR, BEYÂNÎ [ö. 1075/1664-5] DÎVÂN İnceleme – Metin, https://ekitap.kulturturizm.gov.tr/Eklenti/10598,beyani-apdf.pdf?0
0
0
Yorum Yapmak için Kayıt Olun veya Giriş Yapın