MURABBA 11 Melâhat mülkine bir şâh-ı ‘âlem şimdi serverdür

 

MURABBA 11

 

Mefâ‘îlün/ Mefâ‘îlün/ Mefâ‘îlün/ Mefâ‘îlün

 

Melâhat mülkine bir şâh-ı ‘âlem şimdi serverdür

Şecâ‘at kûhına gûyâ mehâbetle gazanferdür

Hilâl-ebrû melekler içre ol bir mâh-peykerdür

Yine bir sâde-rû sevdüm ki nâmıyla Kalender’dür

 

Halâs idüp göñül ‘allâmesin envâ‘-ı müşkilden

Hat-ı gayrı terâş itdüm kalenderler gibi dilden

Yudum destüm ser-â-ser bâd u âb u âteş ü gilden

Yine bir sâde-rû sevdüm ki nâmıyla Kalenderdür

 

Yakup dâgı pür itdüm lâlelerle sînemüñ bâgın

Revân itdüm gülistânumda eşk-i çeşmüm ırmagın

Işıklar gibi dilde ‘ışkınuñ tekrâr idüp dâgın

Yine bir sâde-rû sevdüm ki nâmıyla Kalenderdür

 

Olup ser-pâ bürehne cân u dilden oldum abdâlı

Ser-â-serler gibi ‘ışkında geydüm köhne bir şâlı

Firâkında dil-i dîvânemüñ bilmez nedür hâli

Yine bir sâde-rû sevdüm ki nâmıyla Kalenderdür

 

Çerâg-ı ‘ışkı yakdum hânkâh-ı gamda pîr oldum

Kemend-i kâfir-i zülfine ey Ravzî esîr oldum

Cihâna ‘ışk ile geldüm ne şâh u ne vezîr oldum

Yine bir sâde-rû sevdüm ki nâmıyla Kalenderdür

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009