MURABBA 22 Ân-ı hüsnüñ devridür ey dâver-i devrân ‘Ali

MURABBA 22

 

Fâ‘ilâtün/ Fâ‘ilâtün/ Fâ‘ilâtün/ Fâ‘ilün

 

Ân-ı hüsnüñ devridür ey dâver-i devrân ‘Ali

Anuñiçün oldı ‘âlem bende-i fermân ‘Ali

Yaraşur dirsem saña şîr-i ner-i Yezdân ‘Ali

Ey melâhat menba‘ı şâh-ı cihân sultân ‘Ali

 

Bâg-ı hüsnüñ bu letâfetle gül-i bî-hârısın

Bûstân-ı cânumuñ bir serv-i hoş-reftârısın

Ser-be-ser mecmû‘-ı ‘âlem halkınuñ hünkârısın

Ey melâhat menba‘ı şâh-ı cihân sultân ‘Ali

 

Dest-i mihrüñ koparup göñlüm der-i Hayber gibi

Âsitânuñ beklerin şâm u seher Kanber gibi

Pâdişehler hıdmet eylerler saña Kanber gibi

Ey melâhat menba‘ı şâh-ı cihân sultân ‘Ali

 

Düldül-i hüsne süvâr olup ki cevlân idesin

Zü’l-fekâr-ı cevr ile bir demde biñ kan idesin

‘Âlemi lâyık mı Hayber gibi vîrân idesin

Ey melâhat menba‘ı şâh-ı cihân sultân ‘Ali

 

Dest-gîr ol merhamet kıl ‘âşık-ı üftâdeye

Cevr ü zulmi yeter itdüñ Ravzi-i dil-dâdeye

Pâdişehsin ‘adl ü dâd it bende vü âzâdeye

Ey melâhat menba‘ı şâh-ı cihân sultân ‘Ali

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009