MURABBA 8 Benden yüri ey nâme o sultâna selâm it

 

MURABBA 8

 

Mef‘ûlü/ Mefâ‘îlü/ Mefâ‘îlü/ Fe‘ûlün

 

Benden yüri ey nâme o sultâna selâm it

Biñ ‘izzet ile ol şeh-i hûbâna selâm it

Cân tuhfesini iledüp ol câna selâm it

‘Arz eyle benüm hâlümi cânâna selâm it

 

‘Uşşâka mey-i la‘l-i lebin sunsun o cânan

Geçsün yire kanı kurıyup kân-ı Bedahşân

Cân ile reh-i hıdmete ‘azm eyle şitâbân

Var ol dil ü cân derdine dermâna selâm it

 

Agyâra gülünc itdi beni agladur oldı

Dil hânesi derd-i gam-ı cânân ile toldı

Beñzüm sararup tâb-ı teb-i hecr ile soldı

Bülbül gibi var ol gül-i handâna selâm it

 

Ol demde ki sen göresin ol şems-i cihânı

Eflâke çıkar âh ile feryâd u figânı

Fâş idüp aña şevkıle bu sırr-ı nihânı

Ben zerreden ol mihr-i dırahşâna selâm it

 

5 Alıcak eline seni ol Yûsuf-ı Ken‘ân

Düş ayagına eyle Zelîhâ gibi efgân

Kefşine sürüp yüzüñi çeşmüñden akıt kan

Ol cân u dil eglencesi cânâna selâm it

 

Ger açup okursa seni ol gözleri şehlâ

Göster aña ta‘zîm ü vekâr eyleme gavgâ

Çâk itmeye tâ hışm idüp ol şûh-ı dil-ârâ

Ol şîvesi çok âfet-i devrâna selâm it

 

Ravzî kulınuñ hâlini sorar ise ol yâr

Kıldı diyesin hasret-i çeşmüñ anı bîmâr

Kulagına söyle sakın işitmesün agyâr

Ben bendeden ol server-i hûbâna selâm it

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009