MURABBA’ BÂ-TAZMÎN-İ MISRA’-I HÂCE ‘ABDU’LLÂH

 

 fe’ilâtün fe’ilâtün fe’ilâtün fe’ilün

1

 Dîdemüñ katreleri kim şerer-efşân dökilür

 Sanki nâr dânesi çün la’l-i Bedahşân dökilür

 Sâhil-i eşke kıyâs itmege mercân dökilür

 “Gözlerümden kadeh-i ‘aşka kızıl kan dökilür”

2

 Çünki sen fitnegerüñ itdi felek meftûnı

 Leylî-i hüsninüñ olsam ya n’olur Mecnûnı

 Câm-ı ser-şâr-ı gamuñ nûş ideli ey hûnî

 “Gözlerümden kadeh-i ‘aşka kızıl kan dökilür”

3

 Dahi olmaz mı hevâ-yı gam-ı ‘aşkuñ gül-bîz

 Dahi güldürme misin ‘âşıkuñı ey hûn-rîz

 İtme misin dahi hûn-hwâreliginden perhîz

377

 “Gözlerümden kadeh-i ‘aşka kızıl kan dökilür”

4

 ‘Âşıkuñ her biri ‘aşkuñ ile bir hâletde

 Kimisi sohbet ü ülfetde kimi hayretde

 Leb-i la’lînüñ añıldukça dem-i ‘işretde

 “Gözlerümden kadeh-i ‘aşka kızıl kan dökilür”

5

 Sühan-ı ‘aşk ider ‘âkili Pertev şeydâ

 İtdürür sâkit u hâmûşlara vâ-veylâ

 Okuyaldan berü bu mısra’ı bir pâk-edâ

 “Gözlerümden kadeh-i ‘aşka kızıl kan dökilür”

 

Dr. Ekrem Bektaş, MUVAKKİT-ZÂDE MUHAMMED PERTEV DÎVÂNI, Malatya-2007, https://ekitap.kulturturizm.gov.tr/Eklenti/10630,muvakkitzade-pertevpdf.pdf?0