MURABBA Eger ki olduñ ise ümmet-i habîb-i İlâh

 

MURABBA

 

Bismillâhi’r-Rahmâni’r-Rahîm

1

Mefâ‘ilün/ Fe‘ilâtün/ Mefâ‘ilün/ Fe‘ilün

 

Eger ki olduñ ise ümmet-i habîb-i İlâh

Tufeylüñ oldı halâyık cihâna olduñ şâh

Gelür hemîşe dil ü cân kulagına her gâh

Nidâ-yı eşhedü en lâ-ilâhe illa’llâh

47

Şu kimse kim aña tevfîk-i Hak refîk oldı

İki cihânda murâdını ol kişi buldı

Sımâh-ı cân u dili dem-be-dem anuñ toldı

Sadâ-yı eşhedü en lâ-ilâhe illa’llâh

 

Fezâ-yı devlete ‘izzet hıyâmını kursa

Sa‘âdete iremez niçe yilse yöpürse

Murâdı olmasa anuñ ki tursa otursa

Hevâ-yı eşhedü en lâ-ilâhe illa’llâh

 

Hevâ-yı nefsine uyar murâdına irmez

Dilerse bâg-ı behişti nasîb olup girmez

Kimin ki âyine-i kalbine safâ virmez

Fezâ-yı eşhedü en lâ-ilâhe illa’llâh

 

Senüñle ‘akluñ eger Ravzi yâr ise dâ’im

Unutma Rabbüñi mâni‘ hezâr ise dâ’im

Hızâne-i dil ü cân içre var ise dâ’im

Bekâ-yı eşhedü en lâ-ilâhe illa’llâh

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009