MURABBA
6
Fe‘ilâtün Fe‘ilâtün Fe‘ilâtün Fe‘ilün
I
Gözlerümden gice gündüz dökerem hecr ile yaş
Hep beni kanlu yaşum eyledi ‘âlemlere fâş
Nice bir âb-ı revân gibi dögem taşlara baş
N’ideyin çâre nedür veh basayım bagruma taş
II
Vasluña irişecek bir dahi ben sag u esen
Seni ey Yûsuf-ı gül-pîrehen ü gonca-dehen
Bagruma basmaz isem keff-i terâzû gibi ben
N’ideyin çâre nedür veh basayım bagruma taş
III
Beni Ferhâd-sıfat kasdı helâk itmek ise
Tîşe-i hasret ile sînemi çâk itmek ise
Hecr ile cismümi taglar gibi hâk itmek ise
N’ideyin çâre nedür veh basayım bagruma taş
IV
Şimdiden girü riyâzet ideyin bu yerde
Gökde uçmak ile tâ yir ideyin bu derde
Salınursa yüregüm sabr ideyin bu derde
N’ideyin çâre nedür veh basayım bagruma taş
V
Dil ki baş koşdı yine bir nice sîmîn-ber ile
Beni mecnûn gibi añlar ki ura taşlar ile
Ölür isem yapasuz meşhedümi mermer ile
N’ideyin çâre nedür veh basayım bagruma taş
VI
Vasf-ı la‘l-i lebüñi işidicek kân didi
Agız açup kafes ey zerger-i fettân didi
443
Tâs-ı sakkâya dil alup yine mercân didi
N’ideyin çâre nedür veh basayım bagruma taş
VII
Bir perîyi sevüp ol dilber-i dellâk yine
Taş sokmış beline ol beden-i pâk yine
Gögsini bagrına basmışdur olup hâk yine
N’ideyin çâre nedür veh basayım bagruma taş
VIII
Çünki yâd illere Sun‘î beni saldı firâk
Kaddümi iki büküp yüregümi deldi firâk
Hâtem-i zer gibi zerd itdi beni geldi firâk
N’ideyin çâre nedür veh basayım bagruma taş
YRD. DOÇ. DR. HALİL İBRAHİM YAKAR, GELİBOLULU SUN‘Î DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3197 KÜLTÜR ESERLERİ, Gaziantep