MURABBA Gülüñ bülbül çü şimdi mahremidür

MURABBA

 

Mefâ‘îlün Mefâ‘îlün Fe‘ûlün

I

Gülüñ bülbül çü şimdi mahremidür

Güzeller ‘âşıkınuñ hemdemidür

Göñül yâr ile ‘ayşuñ çak demidür

Bahâr eyyâmı ‘işret ‘âlemidür

 

II

Açalum gonca-i kalbi ferahdan

Göñülde kalmasun asla terahdan

Benefşe içelüm zerrîn-kadehden

Bahâr eyyâmı ‘işret ‘âlemidür

439

 III

Tur uykudan gözüñ nergis gibi aç

Varuban sâye-i ‘ar‘arda hoş geç

Gel cür‘a gibi neñ var ise dök saç

Bahâr eyyâmı ‘işret ‘âlemidür

 IV

Elin salar irişdügine ‘ar‘ar

Berü gel diyüben nergis göz eyler

Açup agzını gonca bunı söyler

Bahâr eyyâmı ‘işret ‘âlemidür

 V

Okur mûm ile halkı gülşene gül

Gülistândan yaña uç hemçü bülbül

Halâs ol gussa vü gamdan içüp mül

Bahâr eyyâmı ‘işret ‘âlemidür

 

VI

Suñar gül bülbüle la‘lîn piyâle

İder ser-mest olup bülbül de nâle

Müdâm elde ayak tut hemçü lâle

Bahâr eyyâmı ‘işret ‘âlemidür

 VII

İder gûyendelik bülbül çemende

Tutar def lâleler ol encümende

Mey iç ur na‘ralar ey Sun‘î sen de

Bahâr eyyâmı ‘işret ‘âlemidür

 

Gelibolulu Sun’î (1486- 1534) Hayatı..

YRD. DOÇ. DR. HALİL İBRAHİM YAKAR, GELİBOLULU SUN‘Î DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3197 KÜLTÜR ESERLERİ, Gaziantep