MURABBA -I RAHMÎ ÇELEBİ

 

 

[fe’ilâtün fe’ilâtün fe’ilâtün fe’ilün]

I

1 Gelmedi ideli bu ‘arsada eyyâm mürûr

2 Yiridür çarh-ı kühen zâtuŋ ile itse gurûr

3 İntisâb eyleyen itdi saŋa çok dürlü huzûr

4 Ey tapuŋ maksad-ı aksâ vü kapuŋ dâr-ı sürûr

II

1 İşigüŋ olsa nola melce-i erbâb-ı himem

2 Zâtuŋı eşref-i halk eyledi Dârâ-yı kıdem

3 ‘Akl-ı kül cüz’i su’âlüŋle olupdur mülzem

4 Ey tapuŋ maksad-ı aksâ vü kapuŋ dâr-ı sürûr

III

1 Eyledi ‘akl-ı selîmüŋ şu kadar kesb-i kemâl

2 Kâyil olurdı kelâmuŋı işitseydi Celâl

3 ‘Akl-ı kül vasfuŋı itmekde olur ‘âciz ü lâl

4 Ey tapuŋ maksad-ı aksâ vü kapuŋ dâr-ı sürûr

IV

1 Fikretüŋ eyler ise ‘âlem-i esrâra ‘ubûr

2 Kalmaya perde-i imkânda bir sır mestûr

3 Hˇâce-zâde gibi itseŋ nola fazl ile zuhûr

4 Ey tapuŋ maksad-ı aksâ vü kapuŋ dâr-ı sürûr

V

1 Salmadan dehr beni ayaga sen eyle nazar

2 Pertev-i mihr ile gör şebnemi eflâke irer

3 Seng-i hârâyı güneş terbiyeti la’l eyler

4 Ey tapuŋ maksad-ı aksâ vü kapuŋ dâr-ı sürûr

VI

1 Reşahât-ı yem-i ihsânuŋa irmiş deryâ

2 Geymiş egnine gümüş tügmelü mâ’î hârâ

3 Sensin ol bahr-i kerem ebr-i hayâ kân-ı sehâ

4 Ey tapuŋ maksad-ı aksâ vü kapuŋ dâr-ı sürûr

VII

1 Midhat-i şânuŋı vasf eyleyemez ehl-i beyân

2 ‘Akla yok varmaga ol araya hergiz imkân

3 Yok durur zât-ı şerîfüŋ gibi bir ‘âlî-şân

4 Ey tapuŋ maksad-ı aksâ vü kapuŋ dâr-ı sürûr

VIII

1 Kevkeb-i burc-ı şeref üzre dil efrûz olsun

2 Her giceŋ kadr ü günüŋ ‘îd ile nev-rûz olsun

3 Tâli’üŋ baht-ı bülendüŋ gibi fîrûz olsun

4 Ey tapuŋ maksad-ı aksâ vü kapuŋ dâr-ı sürûr

IX

1 Tab’-ı Rahmî yine cûş eyledi mânend-i bihâr

2 Hâk-i pâyüŋe niçe gevher idüpdür îsâr

3 Terbiyetle nola kılsaŋ anı dürr-i şeh-vâr

4 Ey tapuŋ maksad-ı aksâ vü kapuŋ dâr-ı sürûr

 

Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,