Murabba’ Kâfiye Bâ-Redif ü Vasl u Hurûc u Mezîd În-câ Hâ Revî vü Elif

Redif ü Yâ Vasl u

 Dâl Hurûc u Râ Mezîd

 [Mefâ’ilün Fe’ilâtün Mefâ’ilün Fe’ilün]

 · − · − / · · − − / · − · − / · · −

 -I-

 Yüzüñ ki burc-ı bahâ mihr ü mâhıdur sanemâ

 Safâ viren dile anuñ nigâhıdur sanemâ

 Kapuñ dil ehlinüñ ikbâl ü câhıdur sanemâ

 Tapuñ fütâdelerüñ secde-gâhıdur sanemâ

 -II-

 Hemîşe pîşe vü endîşedür sen âfete nâz

 Güzeller içre olur mı senüñ gibi tannâz

 Tapuñı kıble idinse ‘aceb mi ehl-i niyâz

 Tapuñ fütâdelerüñ secde-gâhıdur sanemâ

 -III-

 Fütâdesidurur ehl-i dil işte sen sanemüñ

 Nola fütâdelere olsa lutf-ıla keremüñ

 Basarsa yüzlerine yiridür güzel kademüñ

 Tapuñ fütâdelerüñ secde-gâhıdur sanemâ

 -IV-

 Anuñ ki sen sanem-ile geçe hemîşe demi

 Olur safâda vü olmaz göñülde hîç gamı

 Kim ola sevmeye cân-ıla sen güzel sanemi

 Tapuñ fütâdelerüñ secde-gâhıdur sanemâ

 -V-

 Diler bu Nazmî ki vasl ola sen güzel saneme

 Murâd-ı cânıdur anuñ ol ire mi o deme

 Muhaldurur o fütâde tapuñdan ol kereme

 Tapuñ fütâdelerüñ secdegâhıdur sanemâ

Yrd. Doç. Dr. Sibel ÜST, EDİRNELİ NAZMÎ DÎVÂNI (İNCELEME-METİN) T. C. KÜLTÜR VE TURİZM BAKANLIĞI, 2012 www.kulturturizm.gov.tr

 Edirneli Nazmi Divanı ve Türki Basit Ekolü