MÜSEDDES

 

[fâ’ilâtün fâ’ilâtün fâ’ilâtün fâ’ilün]

I

1 Âh elinden tâli’üm şâd itmedi bir dem beni

2 Vuslat-ı dil-dârum ile eylemez hurrem beni

3 Gark ider seyl-âb-ı eşk-i dîde-i pür-nem beni

4 Hey meded devrân neye saklar ‘aceb bilmem beni

5 Öldürür âhir belâlarla dirîgâ gam beni

6 Gözüme ‘âlem görinmez seyr ider ‘âlem beni

II

1 Îd-gehde ol hilâl-ebrûyı gördüm şâd-kâm

2 Serv gibi salınup agyâr ile eyler hırâm

3 Sâye-veş pâyına düşdüm âh idüp ben müstedâm

4 Okudum bu matla’ı gûş eyledi her hâs u ‘âm

5 Öldürür âhir belâlarla dirîgâ gam beni

6 Gözüme ‘âlem görinmez seyr ider ‘âlem beni

III

1 Ol geçen ‘âlemleri cânân ile yâd eylerem

2 Ol hayâlât ile dâyim zâr göŋlüm eglerem

3 Tekye-gâh-ı gâmda ben dîvâne oldum iŋlerem

4 Gâh kendümle gehî dîvâra derdüm söylerem

5 Öldürür âhir belâlarla dirîgâ gam beni

6 Gözüme ‘âlem görinmez seyr ider ‘âlem beni

IV

1 Gitdi eyyâm-ı şitâ irişdi hengâm-ı bahâr

2 Şimdi zencîrin sürür dîvânedür her cûy-bâr

3 Her kişi bir servi boylıyı idüpdür der-kenâr

4 Yârsuz ten haste dil efgâr u ‘aklum târ-mâr

5 Öldürür âhir belâlarla dirîgâ gam beni

6 Gözüme ‘âlem görinmez seyr ider ‘âlem beni

V

1 Bir hilâl-ebrû gamından Rahmiyâ oldum hayâl

2 Çarh-ı kej-rev gibi olsam yiridür ser-geşte-hâl

3 Yâr zâlim ‘ışk kâtil sabr ise emr-i muhâl

4 Vâdi-i hayretde kaldum âh kim Mecnûn-misâl

5 Öldürür âhir belâlarla dirîgâ gam beni

6 Gözüme ‘âlem görinmez seyr ider ‘âlem beni

 

Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,