MÜSTEZÂD DER-NA`T-I ŞERÎF
Mef`ûlü Mefâ`îlü Mefâ`îlü Fe`ûlün
Mef`ûlü Fe`ûlün
1 Ey gamzelerüñ nâvek-i elmâs-ı ciger-dûz
Bir kaşı kemânsın
V`ey la`l-i lebüñ dürc-i le`âlî-i dil-efrûz
Bir hokka dehânsın
2 Pervâne-i tâb-ı ruhuñ olmış meh ü hurşîd
İtdükçe tavâfı
Olursa n`ola pertev-i `ışkuñ dil ü cân-sûz
Bir şem`-i revânsın
3 Ey şûh-ı cihân gelmedi kevneyne nazîrüñ
Gelmez yine min ba`d
`Uşşâka olur lutf-ı nigâhuñ edeb-âmûz
Hâle nigerânsın
4 Nâz ile hırâmân olıcak zât-ı şerîfüñ
Ey şâhid-i kudsî
Dâreyne irişdi kademüñden dem-i fîrûz
Mahbûb-ı cihânsın
5 Çeşm ü dil-i Nâmîde mukîm olalı dâyim
Yâduñla hayâlüñ
El-minnetü li`llâh ki olur her demi nevrûz
Mihr-i dil ü cânsın
Yard. Doç. Dr. Ahmet YENİKALE AHMET NÂMÎ DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ