Na‘t-ı Şerîf der Hakk-ı Peygamber
10.07.2017Na‘t-ı Şerîf der Hakk-ı Peygamber ‘Aleyhi’s-selâm
Mefâ‘îlün Mefâ‘îlün Mefâ‘îlün Mefâ‘îlün
1 Dil-i dîvâne olmaz bir nefes hâlî temennâdan
Ki mest-i câm-ı nâz u ‘işvedür bir mâh-sîmâdan
2 Kemîn-i sad-cihân nâz u tegâfül gûşe-i çeşmi 2a
Nigâh-ı rahmet-engîzi leb-â-leb remz ü îmâdan 2b
3 Ne hüsn-i şûhdur ol şem‘-i bezm-ârâda hayrânam
Ki geh mescidden eyler cilve vü gâhî kilîsâdan
4 Degül şebnem kadar tâb-âver-i mihr-i ruhun hurşîd
Niçe hayrân-ı vaslun seyr-i çeşm olsun temâşâdan 4
5 Degüldür tavk-ı kumrî hasret-i reftâr-ı kaddünle
Zuhûr itmiş nühüfte dâglardur serv-i ra‘nâdan
6 Hoşâ feyz-i nesîm-i gülşen-i bâg-ı mahabbet kim
Nevâ-yı zâgi yegdür ‘andelîb-i nagme-pîrâdan 6b
7 Pür idi hûn-ı dilden lâleveş peymâne-i dâgum
Dahı câm u surâhî olmadın leb-rîz sahbâdan 7b
8 Dimâgum gül gibi âşüfte-efkâr-ı perîşândan 8a
Serüm ser-geşteterdür gird-bâd-ı deşt-peymâdan
9 Hum-ı eflâkdan nûş itdügüm sâfî cünûndur hep 9a
Sirişte olmuşam gûyâ ezelde dürd-i sahbâdan 9b
10 Zihî bezm-i mahabbet neşve-i sahbâ-yı bî-‘illet
Ki ser-mestânı hep âzâdelerdür fikr-i ferdâdan
11 Zihî sâkî ki lutfı neş’e-yâb itseydi rindânı
Gelürdi rûh-ı Hâfız teşne-leb hâk-i musallâdan
12 Şefî‘-i rûz-ı mahşer Ahmed-i mürsel emîn-i vahy
Ki oldur Muhbir-i sâdık nihân u âşikârâdan 12b
13 Enîs-i bezm-i Hak tenhâ-nişîn-i kurb “ev ednâ” 13a
Ki oldı pâye-i mi‘râcı ‘âlî ‘arş-ı a‘lâdan 13b
14 Garîk-i bahr-ı lutfı çeşme-i hayvâna nâz eyler
Ki ceyb-i her habâbı pürdür enfâs-ı Mesîhâdan
15 Düşeydi sâye-i kûh-ı vakârı Tûr-ı Sînâya
Ham olmazdı kad-ı her zerresi bâr-ı tecellâdan
16 O denlü hükm-i şer‘inden cihân sâhib-vera‘dur kim 16a
‘Utârid Zühreye tesbîh ider ‘ıkd-ı Süreyyâdan
17 Eger tecrîd olaydı mu‘teber yanında ‘Îsâveş
Çıkardı sûret-i ecsâm terkîb-i heyûlâdan
18 Nesîm-i la‘l-i nûşîni vezân olsaydı deryâya 18a
Giderdi haşre dek telhi mezâk-ı âb-ı deryâdan
19 Şeb u rûz olmasaydı devr-i gerdûn gird-i kûyında 19a
Olurdı tîreter hurşîd u meh kandîl-i tersâdan 19b
20 Sezâdur olsa ferşi âstânun dîde-i Cibrîl 20a
Ki kûh-i Kâfa yigrek nergis olmaz çeşm-i ‘ankâdan 20b
21 Zamîr-i rûşeni zulmet-zidây-ı ‘âlem olsaydı
Ziyâ kesbin iderdi dîde-i hurşîd a‘mâdan
22 Fenâ-yı hasmı sârî öyle tab‘-ı lafz ü ma‘nâdan
Ki isbâtında lâ meftûm olur mazmûn-ı illâdan
23 Zuhûr-ı çâr-yârı çâr güldür bâg-ı ‘âlemde 23a
Ki reng ü bû vü berg ü bârı birdür lutf-ı Mevlâdan 23b
24 Ebû Bekr ol şeh-i fermân-revâ-yı ‘âlem-i tasdîk
Ki subh-ı sıdkı mahv itdi sevâd-ı kizbi dünyâdan
25 ‘Ömerdür kim miyân-ı hakk u bâtıl farkı zâhirdür
Anunçün ismi mahsûs oldı Fârûk ile esmâdan 25b
27 ‘Alîdür ol ki cevher yerine şemşîr-i kahrında
Kazâ menşûr-ı feth itdi rakam “innâ fetahnâ”dan 27b
28 Risâlet-destgâhâ bende Âgâh-ı dil-efgârun
Kemîne çâkeründür belki ednâter her ednâdan
29 Hasûd-ı kîne-cû bî-mihr ü düşmen kevkeb-i tâli‘ 29a
Zamâne hasm-ı erbâb-ı ma‘ârif zîr ü bâlâdan
30 Velî olmaz mükedder sâf-dil gerd-i melâmetle 30a
Ne gam âyîne-i hurşîde seng-i ta‘n-ı a‘dâdan
31 Vefâdan öyle mahzûnam ki ‘âşık hicr-i dilberden
Cefâdan öyle mesrûram ki a‘mâ çeşm-i bînâdan
32 Heves hˇâhiş-ker-i sehv ü hatâ bâzâr-ı gafletde 32a
Gönül âbisten-i sad-gussa tab‘-ı ma‘siyet-zâdan
33 Huzûr-ı ‘izzete dest-i tehî geldümse ma‘zûram
Der-i şâha ne lâyıkdur gedâ-yı bî-ser ü pâdan
34 Hevâ-yı mihr-i ruhsârunla geldüm gülşen-i dehre
N’ola şebnem gibi lutfunla gitsem pâk dünyâdan 3
35 Ne denlü ümmetün olsa siyeh-rû cürm ü ‘isyândan
Yem-i lutfun yine sâfîter eyler dürr-i yektâdan 35b
36 Hemîşe tâ hadîd-i evciledür nâle-i ‘uşşâk 36a
Ola fevc-i melâ’ik na‘t-hˇânun ‘arş-ı a‘lâdan
Dr. ŞERİFE AKPINAR’ ÂGÂH (Semerkândî-i Âmidî) DÎVÂN, KÜLTÜR VE TURİZM BAKANLIĞI KÜLTÜR ESERLERİ 502 2012,
0
1
Yorum Yapmak için Kayıt Olun veya Giriş Yapın