Mefâ`îlün mefâ`îlün mefâ`îlün mefâ`îlün
1 Nasîbi dîdenün âb u dilün tâb oldı kısmetde
Gözüm ser-mâyeyi harcandı dil ammâ ticâretde
2 Felek bir gamla her şeb hâtır-ı mahzûnumuz yoklar
Bizi eglencesiz mi anlar âyâ künc-i mihnetde
3 Şarâb-ı telh-i bezm-i gamda bir lezzet bulur `âşık
Komamışlar meger ol çâşnîyi câm-ı `işretde
4 Meded ey şeh-süvâr-ı hüsn esb-i nâza çignetme
Görince `âşık-ı üftâdeyi hâk-i mezelletde
5 Güzelsin sana şâhum âşık-ı sâdık geçer çokdur
Bakarsan hakk ile Yahyâ gibi yokdur hakîkatde
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147