Gazel

 

Ne cânlar yakdıgın ol âfetin dil-gîr olandan sor

Nasıl sihr itdigin ‘uşşâkına teshîr olandan sor

 

Ne bilsin zâhid-i nâ-dân anın nakş-ı dil-ârâsın

O şûhun sûretin bir kalbine tasvîr olandan sor

 

Felâtûnlar olur ‘âciz bilinmez ‘akl ile hâlim

Benim rüsvâlıgım ‘aşk içre pür-tedbîr olandan sor

 

Degil nân-hârgân gam-hârgânın ekseri bilmez

Bu ‘aşkın mâyesin sen ‘aşk ile tahmîr olandan sor

 

Çekilmez bir kemân-ı sahtdır Yâver belâ-yı ‘aşk

Felek hamyâzesin çekmiş anı bir pîr olandan sor

 

Üstüner, Kaplan (2010). Enderunlu Hasan Yâver Divan İnceleme-Metin-Çeviri-Dizin. Ankara: Birleşik Yay.105.