Ne nâzük cilvelerle gülmişidüñ geldigüñ günler
14.04.2016
Mefâ‘îlün Mefâ‘îlün Mefâ‘îlün Mefâ‘îlün
1. Ne nâzük cilvelerle gülmişidüñ geldigüñ günler
Ser-i peykân-ı müjgânuñla bagrum deldigüñ günler
2. Ferâgatde hemâna şâh kendü ‘âlemindeyken
Ne sihr itdüñ a zâlim âh ‘aklum çeldigüñ günler
3. Benüm senden murâdum yog iken hâlüm diger-gûndur
Kanı ardum sıra bâd-ı sabâ tek yeldigüñ günler
4. Ben imhâl üzre saña göñlümi virmekde bi’llâhi
‘Aceb gelmez mi cânâ hâtıra mühmeldigüñ günler
5. Göñül bu pîrlikde nev-cüvânlık vakti mi sanduñ
Ne idi pîr iken ol şevk ile genceldigüñ günler
6. Visâlüñ hâletin zor añlamışken fart-ı gayretle
Ne idi sevdigüm genceldigüñ inceldigüñ günler
7. Benümle âşinâlık yog iken kimlerle eglendüñ
Şükür geçdi hele bî-gânelikler eldigüñ günler
8. Kıdem da‘vâsı eylerdüñ rakîb-i hâdise her gâh
Saña bu fahr yetmez mi idi övüldigüñ günler
9. Karâruñ yok esüp savurmadan ârâmsızlıkdan
Bu günler mi ‘aceb Kânî sabâveş bildigüñ günler
Dr. İlyas YAZAR , K Â N Î D Î V Â N I, Ankara 2012
0
0
Yorum Yapmak için Kayıt Olun veya Giriş Yapın