Nev-bahâr oldı girü bâg-ıla büstânı görüñ

Nev-bahâr oldı girü bâg-ıla büstânı görüñ (368/1)

Nice ser-sebz-durur tâze gül-istânı görüñ

 

Nicesi saçdı hevâ anber-i sârâyı bahuñ (368/2)

Nicesi dökdi bulıt gûher-i Ummânı görüñ

 

Nice Dâvud bigi nâle ider bülbül-i mest (368/3)

Nice düzmiş girü gül çetr-i Süleymânı görüñ

 

Câm-ı zer almış ele nergis-i ranâya bahuñ (368/4)

Sâgâr-ı lal dutar lâle-i nucmânı görüñ

 

Çün sabâh irdi vü oldı girü hoş vakt-i sabûh (368/5)

Giceden var mı dahı_ol lal-i Bedahşânı görüñ

 

Ellerin nice götürmiş göge şöyle ki çınâr (368/6)

Şeh duâsında durup serv-i hırâmânı görüñ

 

Mey-i reyhâniye sâkî ola her kişi zi hayf (368/7)

Anı suñmahlıga ol saçları reyhânı görüñ

 

Nergis ü gül ne gerek ol göz-ile yüze bahuñ (368/8)

Lal-ile dür ne gerek ol leb ü dendânı görüñ

 

Yile varur gülüñ evrâkı nazar itmeñ aña (368/9)

Ahmedî yazdugı bu defter ü divânı görüñ

 

Dr. Yaşar AKDOĞAN, Ahmedî DÎVÂNI, T. C. KÜLTÜR VE TURİZM BAKANLIĞI, 3141 KÜLTÜR ESERLERİ 424