Mütefâ`ilün fa`ûlün mütefâ`ilün fa`ûlün
1 Nice sabra yer kalur çün yer ide o yâr dilde
Harekât-ı dil-firîbi koya mı karâr dilde
2 Teni şerha şerha kılsa kılıcı bilürdi adum
Ki dil ile şerhe gelmez nice gussa var dilde
3 Gözimün yaşı dükendi dahı hûn-ı dil dükenmez
Var iken cefâ taşıyla nice inkisâr dilde
4 Gam-ı la`li ile çeşmüm şeb ü rûz girye eyler
Söyünür mi degme sudan görün ol şerâr dilde
5 Yine cân-ı nâ-tüvâna su sepildi oklarından
Reşehât-ı lutfı Yahyâ komadı gubâr dilde
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147