O la‘l-i âteşînden gonca beñzinde eser gördüm

 

Mefâ‘îlün Mefâ‘îlün Mefâ‘îlün Mefâ‘îlün(1)

 

1. O la‘l-i âteşînden gonca beñzinde eser gördüm

 Dehânın açdı çün bakdum derûnında şerer gördüm

 

2. Mahabbet meclisinde sâkî pinhân meyde yok noksân

 ‘Aceb bu k'ehl-i bezmi cümle mest-i bî-haber gördüm

 

3. Kazâ murgı mıdı bilmem nihâl-i ‘ömrüme kondı

 Kızıl yâkûtdan minkârı bir murg-ı şeh-per gördüm

 

4. Sakın ey gussa vü gam sîne-i pür-sûz ulı yirdür

 Dikilmiş nîze üzre anda niçe kanlu ser gördüm

 

5. Göñül sengin yakup câm itmeyince ‘ışk üstâdı

 Ben anda sanma Emrî yâr ‘aksin cilve-ger gördüm

 

Prof. Dr. Mehmet A. Yekta SARAÇ, EMRÎ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3144 KÜLTÜR ESERLERİ 427