O sehî-serv-i bülendüŋ kad-i mümtâzına bak
16.09.2017
341
Fe‘ilâtün Fe‘ilâtün Fe‘ilâtün Fe‘ilün
1 O sehî-serv-i bülendüŋ kad-i mümtâzına bak
Hâksârân-ı gamuŋ rütbe-i pervâzına bak
2 ‘Âşıkuŋ nâliş ü feryâdına bakma her dem
Kolına aldugı ol gözleri şâh-bâzına bak
3 Tâ kıyâmet koparur başına üftâdelerüŋ
O şehüŋ cünbiş-i reh-vâr-ı sebük-bârına bak
4 Şîşede bâdeyi fânûsda gör şem‘i hemân
‘Âşık-ı gam-zedenüŋ mahfaza-i râzına bak
5 Goncanuŋ çâk-i girîbânını gör gülşende
‘Andelîbüŋ eSer-i şu‘le-i âvâzına bak
6 Çeşm-i germ-i tama‘ı hûnî kebâb itmiş iken
Zâhidüŋ câm-ı meye sunmadaki nâzına bak
7 Rîsmân-bâzlaruŋ mehlekede raksını gör
Zülfine beste olan ‘âşık-ı ser-bâzına bak
8 Çeşm-i gûyâ-yı dil-ârâ ile oldı hem-harf
SÂKIB’uŋ sâhire-i kilk-i füsûn-sâzına bak
Kırbıyık, Mehmet. Kâtib-zâde Sâkıb Dîvânı. https://ekitap.kulturturizm.gov.tr/dosya/1-275466/h/katibzade-sakib.pdf [erişim tarihi: 01.05.2013]
