Fāʿilātün fāʿilātün fāʿilātün fāʿilün

Ol cihān gülzārınuñ raʿnā ġazel-ẖānı dürüst
Ḫoş temām etmiş bu beytī içre dīvānı dürüst
Ḫaṭṭ·ı reyḥān kim ṭolanmışdur gülistānı dürüst
Hāledür kim devr idüpdür māh·ı tābānı dürüst

Cān ile ḳıldum temāşā rūy·ı cānānı dürüst
Ṣāniʿ·i ḳudret ki naḳş etmiş gülistānı dürüst
Ṣafḥa·yı ẖaddında yazmış ẖaṭṭ·ı reyḥānı dürüst
Ḥāledür kim devr idüpdür māh·ı tābānı dürüst

Ḳāmeti cān gülşeninde serv ü ʿarʿar baġlamış
Ḥüsninüñ şemsi cihān bāġına enver baġlamış
Ruẖlarında ḳākülüñ müşkīni ʿanber baġlamış
Hāledür kim devr idüpdür māh·ı tābānı dürüst

Ḳaşları ḳavs·ı felekdür ṣüreti bedr·i ḳamer
Gün cemālidür cihān rūyına viren nūr u fer
Ḳaplamışdur dil-berüñ gūyā miyānını ḳamer
Hāledür kim devr idüpdür māh·ı tābānı dürüst

Cemʿ olup bir bezme gelmişler nice cānāneler
Ḥalḳa ḳurmış murġ·i cānā zülfi dökmiş dāneler
Şemʿ·i ruẖsārına ol meh-rūlaruñ pervāneler
Hāledür kim devr idüpdür māh·ı tābānı dürüst

Devr ider cām·ı şarābı sāḳī·i meh-pāreler
Nūş ider ʿışḳ·ı meyden ʿāşıḳ·ı bī-çareler
Ol mehi ḳılmış īḥāṭā göz açup seyyāreler
Hāledür kim devr idüpdür māh·ı tābānı dürüst

Cān alur çeşmi dili yaġma ḳılur ḥükmi revān
Līk ḳılsañ bir naẓar ḥüsni baġışlar cāna
Dir gören anuñ girībān ile gerdānın hemān
Hāledür kim devr idüpdür māh·ı tābānı dürüst

Şehr-·i Āmāsiyyede bir ẖūb u raʿnā gülzār
Her ṭarafda cān u dilden ṣad hezār ʿuşşāḳı var
Çevresinde dāˀire çekmişdür anuñ kūhsār
Hāledür kim devr idüpdür māh·ı tābānı dürüst

Ṭāliʿüñ sād oldı Mihrī yeñdi baẖtuñ aẖteri
Başuña ṭoġdı ġam·ı ẓulmetde devlet ẖāveri
Ol melek-manẓar ḳamerçehr ile çarẖuñ çenberi
Hāledür kim devr idüpdür māh·ı tābānı dürüst

Prof. Dr. Mehmet Arslan, Mihrî Hâtun Dîvânı, T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2018 ISBN: 978-975-17-4027-4