Ol ‘işvekârıñ etdigi hep nâzdır baña

Gazel

[9]

 [mef’ûlü / fâ’ilâtü / mefâ’îlü / fâ’ilün]

 1 Ol ‘işvekârıñ etdigi hep nâzdır baña

 Zâtında cevri çok ise de azdır baña

 2 Çeşm-âşinâlık eylemiş agyâra gamzesi

 Îmâ eden de soñra o gammâzdır baña

 3 Müşkil degil mi saydı rakîbâ o âfetiñ

 Kebg-i derî ise saña şehbâzdır baña

 4 Pür-nâle eyleyen dilimi zahm-ı sînedir

 Bu nagmelerde ney dahi dem-sâzdır baña

 5 Feryâd edince hâr-ı cefâ-yı zamâneden

 Bî-çâre ‘andelîb hem-âvâzdır baña

 6 Ben ol Hümâ-yı himmetim evc-i felekde kim

 Bâl-i şikeste şehper-i pervâzdır baña

 7 Bezm-i sühande meşreb-i Hâfız'la Vehbiyâ

 Bu neş’eyi veren mey-i Şîrâz'dır baña

Yrd. Doç. Dr. Ahmet YENİKALE, SÜNBÜL-ZÂDE VEHBÎ DÎVÂNI, Kahramanmaraş 2012

 Sünbülzade Vehbi Hayatı