Mef`ûlü mefâ`îlü mefâ`îlü fa`ûlün
1 Olmazdı dila ana bahâ nakd-i dil ü cân
Bir kâse-i nîlîde eger olmasa hicrân
2 Aşık nola nâ-cîz ise de gönli büyükdür
Sanma ele almak anı şâhum ola âsân
3 Kurtulmadı dil hâr-ı gam u deşt-i sitemden
Çâk olsa nola gül gibi dâmân-ı perîşân
4 Bir vaz`-ı hasen itdi koyup sîneye bir dâg
Bir iki elif çekdi yine eyledi ihsân
5 Yahyâ bize bir pâdişeh-i dâd-ger olsa
Ahdinde şikest olmasa hâtır gibi peymân
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147